Novas Aristanesas, martis 14 de maju de su 2024
Isetu mannu pro s'abertura noa de su ponte de Marceddì - Mancat pagu a s'acabbu de is traballos in su ponte de Marceddì, chi a intro de s'istadiale dd'ant a torrare a sa comunidade de Terraba e a totu is chi andant in villegiatura a sa Costera Birde e chi ddoe ant a pòdere torrare a passare cun is veturas issoro.
Su ponte dd'aiant serradu a su tràficu in su mese de ghennàrgiu e s'incarreru de is traballos aiat ingendradu istorbos mannos a is chi fiant avesos a si-nde serbire. Is operadores de sa Costera Birde si fiant chesciados pro su perlongamentu de is traballos e pro su cuncordu de unu cantzellu serradu chi portaiat a is turistas a renuntziare a is vacàntzias in is prajas bellas de sa costera, pro more ca depiant fàghere su fùrriu longu.
Ma fintzas su Cunsòrtziu de is cooperativas de sa pisca de Marceddì s'est chesciadu unas cantas bortas cun is autoridades marìtimas e forestales, pro ite ca is piscadores isportivos sighiant a passare in su ponte de sa borgata pro praticare sa pisca, mancari esseret proibidu a ddoe passare.
In su ponte, chi serbit sa borgata de Marceddì e chi permitit de lòmpere seghende in curtzu a su mare de Arbus, at a fàghere a ddoe passare a fìlada ùnica intreverada e su tràficu dd'at a regulare unu semàfuru. Ant a abèrrere fintzas is ventaneddas cara a mare, pro sa cuncàmbia de s'abba. Un'interventu abetadu fintzas dae is piscadores de sa borgata, chi si chesciaiant pro ite ca su ponte at impeigadu s'ossigenatzione de s'abba e chi tenent s'ispera immoe chi s'òpera acontzada favoressat s'intrada de prus pische.
Custu est isceti su primu lotu de is traballos de adatamentu de s'infrastrutura e, giai a pustis de s'istadiale, ant a incarrerare is traballos de su de duos lotos de interventos, gràtzias a un'àteru finantziamentu de 5 milliones de èuros dae parte de sa Regione. Passadu s'istadiale, ant a acabbare is traballos de acontzu de su ponte, intra de interventos istruturales, s'alladiamentu, su cuncordu de su guardrail e, in fines, s'illuminatzione.
"S'ispera est chi, cun s'acontzu de su ponte, su turismu nde potzat gosare e cun custu fintzas totu is chi ddoe traballant, dae is piscadores a is ristorantes a totu is àteros traballadores", at naradu su vitzesìndigu e assessore de is Traballos pùblicos, Andrea Grussu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.