Giovedì, 2 maggio 2024
In Aristanis e in su mundu pro bìvere s'isport - Nominada 'Tzitade de s'Isport' in su 2019, Aristanis sighit a si seberare pro is addòbios isportivos chi acasàgiat.
Si cumentzat dae is finales natzionales de ginnàstica rìtmica feminile, cun sa presèntzia in tzitade de prus de 400 atletas intra de 7 e 18 annos, tramudende a s'ischerma cun su campionadu regionale a iscuadras, fintzas a is seletziones sardas de Crazy for Football, sa Natzionale de fùbalu a 5 pro persones cun problemas de salude mentale.
E, si atletas meda ònnia chida andant a Aristanis pro ddoe fàghere is trivas, aristanesos meda amegant de si seberare in totu su mundu pro is fainas isportivas issoro.
Comente a Nicolò Spanu, deghennoe annos, chi sighit a bìnchere in sa disciplina de su wingfoil. S'ùrtima bìnchida dd'at otenta in Ouistreham, in Normandia, in sa regata VikWing, a ue ddoe ant pigadu parte unos 80 atletas.
Su giòvanu de Aristanis at paradu fronte a unu bentu chi non fiat in favore, ma a pustis de sete proas at otentu bator primos postos, unu segundu postu e est lòmpidu duas bortas in su de chimbe iscaleris de su palcu. Spanu s’allenat cun sa sorre Maddalena, 17 annos, chi pro como est sa campiona de su mundu in càrriga de wingfoil.
Àteru bàntidu de sa tzitade est su canoteri olìmpicu Stefano Oppo. Su pitzocu, chi tenet 29 annos, at conchistadu sa medàllia de prata in is campionados europeos de Szeged, in Ungheria.
S'atleta, chi faghet parte de s'Arma de is Carabineris, at fatu a trivas in is pesos lèbios addopiados maschiles paris cun su cumpàngiu de aventuras Gabriel Soares. Is duos atletas fiant acanta de otènnere sa bìnchida assoluta in una triva bastante dificultosa, ma ddis est tocadu a s'arrèndere in dae in antis de is isvìtzeros Jan Schaeuble e Raphael Ahumada Ireland. Su brunzu, imbetzes, est tocadu a is norvegesos Lars Benske e Ask Jarl Tjoem.
Pro Stefano Oppo custa est una simana de importu mannu: su giòvanu, difatis, amegat de s'allenare pro sa de tres olimpìades, in programma in Parigi custu istadiale, dae su 26 de trìulas a s'11 de austu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.