In regordu de is mortos pro more de s’amiantu – “Dae cando, in su 2007, aiant postu su registru de is mesoteliomas, in provìntzia de Aristanis si contant unos 300 mortos pro more de maladias ligadas a s’amiantu”. Custos sunt is datos frunidos dae su presidente de s’Assòtziu de is ex espostos, Giampaolo Lilliu, in ocasione de is fainas cuncordadas pro sa Die de is mortos pro more de s’amiantu.
Su primu addòbiu dd’ant fatu in sa tunda de bia de Petri, in Aristanis, in ue in is annos passados ddoe ant postu un’istàtua in regordu de totu is mortos pro more de custa fibra ochidora. Presentes is autoridades tzitadinas, is delegatziones formadas dae unas cantas viudas e dae is dischentes de s’Istitutu cumprensivu de Santeru ant postu una corona de frores a pees de su monumentu.
Is addòbios sighint oe in Santeru, in is iscolas, in ue s’at a chistionare de su diritu a sa salude, de s’amparu de s’ambiente e de sa seguresa in is logos de traballu. “Est de importu a faeddare cun is generatziones noas, pro ddis regordare chi nois, totus, semus traballadores in arriscu”, at naradu su presidente de s’Assòtziu.
S’amiantu ddu cunsiderant oramai una fibra dannàrgia: s’Itàlia est istada intra de is primos paisos chi nd’at proibidu s’impreu comintzende dae su 1992. Comente narat su Ministeru de sa Salude, est unu materiale cantzerògenu, perigulosu meda pro ite presente in s’aera. Si respiradas, is fibras si podent assentare in is partes prus fungudas de is purmones, in ue ddoe podent abarrare fintzas a totu vida, ingendrende a bortas tumores in is purmones fintzas a tretu de annos meda dae cando ddas amus respiradas.
“In Sardigna serbit unu pranu pro is bonìficas e pro nde bogare totu s’amiantu dae is fàbbricos pùbblicos e privados”, at atzuntu su presidente Lilliu. “Serbit un’impignu forte dae parte de sa Regione, chi depet investire cara a sa cultura de sa preventzione. E si comintzet a pensare a una Sardigna lìbera dae s’amiantu, iscriende una data in su calendàriu”, acabbat Lilliu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
