Novas Aristanesas, mèrcuris 13 de martzu de su 2024

Su progetu Famìlliachileghet – Sunt dòighi is biddas de sa provìntzia de Aristanis chi ant a acasagiare Famìlliachileghet, su progetu de promovimentu de sa letura nàschidu dae un’idea de s’assòtziu Lughenè.

Su calendàriu previdet giai 100 addòbios, chi s’ant a fàghere in provìntzia de Aristanis e in àteras biddas de Sardigna. Intra de is biddas chi dd’ant a acasagiare ddoe sunt Busache, Cùglieri, Fordongianus, Milis, Neoneli, Nughedu Santa ‘Itòria, Samugheo, Santu Lussurzu, Tramatza, Ula, Biddobrana e Tzeddiani. Ma ddoe sunt fintzas Atzara e Brebì.

Lòmpida a sa de duas editziones, sa faina est dedicada a is pipios intra de 0 e 6 annos, a is famìllias issoro e a su personale chi si-nde incurat de sa pipiesa: sa punna est su promovimentu de sa letura cun fainas de animatzione, mustras, seminàrios de formatzione, donos de libros.

Intra de is apuntamentos in calendàriu ddoe sunt is “Meries de is Babbos”, cun unu muntone de consìgios utilosos pro sa letura a boghe arta, e “Crèschere Letores”, dedicadu a asilos niu, iscolas de sa pipiesa e bibliotecas. No at a mancare, in prus, “S’arte de contare cun is immàgines”, una mustra de deghe annos presente in Sardigna, Trentinu e in Ispànnia, chi aunit a pare sa letura e s’arte, favoressende is resonadas e s’isvilupu de ideas noas in is criaduras.

Is pipios de is biddas interessadas a su progetu ant a retzire libros a indonu, chi ddos ant a agiudare a pigare istima semper de prus a sa letura.

Intra de is argumentos chi is pipios ant a connòschere mègius ddoe sunt su de chistionare e si cunfrontare cun is àteros, s’amigàntzia, su respetu de pare a pare, apretende pensamentos a cumone. “Semus presados meda de sighire cun Famìlliachileghet su chi amus incarreradu in sa prima editzione, in su 2020”, narat Francesca Frongia, de s’assòtziu culturale Lughenè. “Faeddamus cun is pipios de libros e cun is libros, libros chi parent simpres, pro ite iscritos cun pagos faeddos, ma chi bortas meda cuant una fungudesa de resonu de importu mannu fintzas pro is mannos”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.