Sa provìntzia de Aristanis donat vida noa a is imboddicàmenes – Àtera primatzia pro sa provìntzia de Aristanis, chi si cunfirmat sa provìntzia prus virtudosa in Sardigna pro sa regorta seberada de is imboddicàmenes, cun su 79,7%. Est su chi nde essit a pìgiu dae is ùrtimos datos ISPRA, chi cunfirmant su primu postu de sa provìntzia nostra, a in antis (mancari de pagu) de sa provìntzia de Nùgoro, chi tenet su 79,4%.
Is tzitadinos de sa provìntzia de Aristanis faghent arribare a su Cunsòrtziu natzionale de is imboddicàmenes (CONAI) 96 chilos de imboddicàmene peròmine seberadu a manera giusta (in su 2021 fiant 89,6 chilos), cunforma a is tzitadinos de sa provìntzia de Nùgoro, chi lompent agiomai a 100 chilos peròmine (su pròpiu tantu de su 2021). In su de tres postos, imbetzes, ddoe est sa provìntzia de su Sud de Sardigna, chi propassat su 78,5% de regorta seberada.
“Sa Sardigna”, narat Luca Piatto, responsàbile de CONAI pro is relatas cun su territòriu, “sèberat prus de su 75% de s’àliga sua urbana, comente mustrant is ùrtimos datos frunidos dae s’Istitutu Superiore pro s’Amparu e sa Chirca Ambientale. Una pertzentuale chi permitit a sa regione de si collocare in su de duos postos in sa classìfica de is regiones prus virtudosas a livellu natzionale”.
Totu is provìntzias propassant – e de meda – su 70% de regorta seberada, cunfirmende aici comente sa cultura ambientale de una regorta seberada de s’àliga fata bene siat oramai isparta e raighinada bene intra de is sardos.
“Is sardos faghent una regorta seberada bella e si faddint pagu. Cun su 71,5% de imboddicàmenes seberados”, atzunghet Piatto, “s’Itàlia est giai prima in Europa in custu setore de s’economia tzirculare. Ma a custu resurtadu si-ddoe lompet gràtzias a s’impignu de is regiones: s’atentu de is tzitadinos est de importu mannu”.
In fines, su CONAI donat unas cantas racumandatziones: is iscontrinos bolent fuliados cun s’àliga non seberada; cun su paperi e cun sa cartòcia non tocat de nche fuliare paperi ogiosu e paperi pro forru; is imboddicàmenes de plàstica bolent semper isboidados; is ampuddas bolent ischerfadas de longu a longu e non dae artu a bassu; in fines, su cristallu non bolet fuliadu paris cun su bidru, pro ite ca portat prumu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
