Is iscolas mannas de Aristanis e provìntzia – Is dischentes de tertza mèdia de totu sa provìntzia tenent ancoras pagas dies pro fàghere unu de is sèberos prus de importu de sa vida: su de s’iscola superiore a ue sighire s’àndala de is istùdios issoro.
In Aristanis ddoe sunt iscolas meda chi si podent seberare. In s’Istitutu “Benedetto Croce” ddoe sunt chimbe litzeos: su linguìsticu, su musicale, su de is iscièntzias umanas e s’econòmicu sotziale. A custos si ddoe atzunghet sa nova de ocannu: su Litzeu de su Made in Italy, s’ùnicu in Sardigna.
Cun sa dura sua de chimbe annos, su Litzeu artìsticu “Carlo Contini” agiudat s’imbentu de is pitzocheddos chi bolent fàghere una carriera in su mundu de s’arte, mentras su Litzeu clàssicu “De Castro” tenet sa punna de abèrrere ghennas meda.
De sa famìllia de su “De Castro” nde faghet parte fintzas s’Istitutu de Terraba, cun cursos chi movent dae su Litzeu iscientìficu de su connotu a cussu cun tarea informàtica e is cursos de de Gràfica e de Web marketing.
S’Istitutu “Mariano IV” oferit sa bellesa de chimbe indiritzos: in Aristanis ddoe sunt s’iscientìficu de su connotu, s’isportivu e su biomèdicu; in Ilartzi, imbetzes, si podet seberare intra de su linguìsticu e su professionale.
S’Istitutu tècnicu-industriale “Othoca” tenet duas seas, sa de Aristanis e sa de Abas, in ue si contivìgiat sa passione pro sa tecnologia. Is dischentes podent seberare intra de is indiritzos mecànicu, eletrònicu e informàticu.
S’Istitutu “Don Deodato Meloni” acumpàngiat a is pitzocheddos cara a carrieras in setores diferentes. Ddoe sunt, difatis, s’iscola agrària, s’alberghiera, s’istitutu chi preparat pro is servìtzios sotziu-sanitàrios e su tècnicu-odontotècnicu. Ma ddoe est fintzas s’indiritzu dedicadu a sa moda e a is produsimentos de s’artesania fatos in Itàlia.
S’Istitutu “Mossa” puru oferit unu muntone de prospetivas. Si podent sighire is cursos de Amministratzione, Finàntzia e Marketing, su cursu pro connòschere is Sistemas informativos aziendales, su cursu Turìsticu e Turìsticu-isportivu, e is cursos Fràigos e Ambiente e Trasportos e Logìstica.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
