Novas Aristanesas, lunis 22 de ghennàrgiu de su 2024

Sa Retza de su traballu de calidade in agricultura – Su de non pagare is contributos e su traballu cuadu sunt isceti una pariga de is crititzidades chi dae ora pertocant su mundu de su traballu in agricultura. 

Est pro cussu chi in Aristanis, cuncordada dae sa Prefetura, amegat de nàschere una setzione territoriale de sa Retza de su traballu de calidade in agricultura cun sa punna de avalorare is siendas virtudosas e de premiare a is imprendidores chi respetant is règulas, ma fintzas de assegurare unu livellu artu de legalidade in cussu setore.

Sa Retza dd’ant pensada pro pònnere paris e avalorare, gràtzias a una filera de agiudos diferentes, totu is impresas agrìculas chi respetant sa normativa in contu de traballu, contributos, legislatzione sotziale e òbligos tributàrios. Sa setzione dd’at a coordinare sa Diretzione tzentrale de s’Inps. 

Pro s’allistare in sa setzione territoriale de sa Retza is siendas depent respetare unos cantos rechisitos in matèria de legalidade. Intra de custos, de no àere tentu cundennas penales pro violatziones in su traballu, de no àere retzidu contraventziones pro carchi illètzitu, tocat a èssere regulares versende is contributos previdentziales e pro s’asseguratzione, su de aplicare bene su cuntratu colletivu de setore.

Sa Retza, duncas, est un’aina utilosa pro permìtere a su mundu de su traballu de crèschere in su surcu de sa legalidade.

“Livellos bonos in s’agricultura de sa provìntzia”, at naradu su prefetu de Aristanis Salvatore Angieri in s’addòbiu de cumentzu chi s’est fatu su 18 de ghennàrgiu, “s’otenent fintzas cun fainas chi assegurent sa coesione sotziale, comente a àndalas de formatzione e assistèntzia a is traballadores disterrados”.

“Est un’ocasione bona pro parare fronte e fàghere ismenguare cussas fainas malas chi si bient dae ora in su mundu de su traballu. Sa manera nch’est!”, at acabbadu Angieri, “e tocat a nois a ddi dare aplicu”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.