Novas Aristanesas, giòbia 4 de ghennàrgiu de su 2024

Su Servìtziu Tzivile Universale – Ocannu puru si presentat un’àtera oportunidade bella pro is giòvanos sardos: su Dipartimentu pro is Polìticas giovaniles, difatis, at publicadu su bandu pro su Servìtziu Tzivile Universale.

Dedicadu a is pitzocos chi tenent intra de 18 e 28 annos, permitit de fàghere intra de 8 e 12 meses de servìtziu pro sa comunidade, cun progetos chi ant a favorèssere sa crèschida in sa carrera personale e in cussa de su traballu.

Publicadu in su mese de nadale passadu, su bandu agiudat sa bellesa de 2023 progetos in totu Itàlia chi pertocant setores diferentes, dae su promovimentu turìsticu a sa cultura, dae s’educatzione ambientale a s’agiudu a is fascas dèbiles de sa populatzione a s’iscoberta de is fainas bellas de s’Amparu Tzivile.

In Sardigna is progetos sunt 456 e, de custos, 59 s’ant a fàghere in provìntzia de Aristanis. In su setore culturale, si sèberant is progetos presentados dae is Comunes de Sàgama, Santeru, Milis e Useddus, a prus de cussos presentados dae is Pro Loco de Arborea, Aristanis, Sini e Busache.

Chie imbetzes bolet agiudare a is àteros ddu podet fàghere a intro de is progetos de agiudu a is persones cun disabilidade cuncordados, pro nde regordare calicunu, dae is setziones aristanesas de s’Aism, de s’Unione de is tzurpos e de sa Rughe Ruja.

Intra de is punnas de unos cantos progetos de su Servìtziu Tzivile ddoe est imbetzes sa de interessare sa comunidade cun fainas de abbiatzamentu e cun su promovimentu de servìtzios de informu e de agiudu. In is meses imbenientes, is tzitadinos de Arborea, Gonnostramatza, Samugheo e Abas s’ant a pòdere bàlere de unos cantos giòvanos fracòngios prontos a agiudare a chie nde tenet bisòngiu.

Ma is voluntàrios de su Servìtziu Tzivile si-nd’ant a incurare fintzas de ambiente: in Ilartzi, in Sèdilo e in Terraba ant propostu, difatis, progetos de educatzione a s’isvilupu sustenìbile, mentras dae su Comune de Aristanis lompet sa proposta pro cuncordare fainas acapiadas a su rolu de s’Amparu Tzivile e pro ismenguare is arriscos.

Is pitzocos interessados ant a pòdere presentare sa domanda fintzas a su 15 de freàrgiu, seberende de nche passare una pariga de meses agiudende is comunidades in ue bivent.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.