Novas Aristanesas, giòbia 18 de ghennàrgiu de su 2024

Tres biddas de sa provìntzia de Aristanis sena de abba bella a bufare – Sunt istadas tres dies de istorbu mannu pro is tzitadinos de tres biddas de sa provìntzia, Milis, Siamaiore e unos cantos bighinados de Aristanis, chi si sunt agatados totu in una sena de abba bella a bufare. 

Is sìndigos ant dèpidu bogare luegos un’ordinàntzia, pro ite ca dae is analizos fatos a unos cantos campiones de abba nd’est essidu a pìgiu chi no resurtaiat prus bella a bufare, e duncas est mòvidu su proibimentu a dda pònnere pro cuncordare màndigos.

In Milis custa genia de istorbu no est cosa noa, cunsideradu chi giai dae tempus meda est acontèssidu fatu-fatu de dèpere bogare ordinàntzias pro proibire s’impreu de s’abba pro more de sa presèntzia de metallos graes e de ludu. E, si si pensaiat de àere agatadu unu remèdiu pro cussas dificultades, ocannu s’emergèntzia dd’at ingendrada unu black out acontèssidu a primìtziu de mese e chi, su 7 de ghennàrgiu, at guastadu su sistema de is pompas chi assegurant s’abba a sa bidda, lassende a is tzitadinos sena de abba. Acontzadu su guastu, comente si siat, a medas est abarrada sa duda chi s’abba no esseret bella a bufare, domandende de dd’analizare. Abetende is resurtados, su Comune at leadu su determinu de nde proibire s’impreu e de serbire sa populatzione cun is autobotes de Abbanoa.

Ma is autobotes càrrigas de abba sunt arribadas fintzas a Aristanis, a Siamaiore e a Santu Lussurzu: in sa tzitade de Lionora puru, in sa bidda de sa Badde Bassa de su Tirsu e in sa bidda de Monteferru s’abba est resurtada no adata pro impreos alimentares. Abbanoa at postu in craru chi is proiduras de chida passada, a pustis de una simana longa de sicànnia, ant intrulladu tropu s’abba de is mitzas de Santu Miali e Bau Nou. E a custos comunes ddoe arribat s’abba de cussas mitzas. Si però in Siamaiore totu sa bidda est abarrada sena de abba, in Aristanis s’ordinàntzia pro no dda bufare at pertocadu a is tzitadinos de su tzentru istòricu isceti, a cussos de arborada de Briantza e de pratza de Porta Manna.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.