Novas Aristanesas, martis 4 de làmpadas de su 2024
4 Giugno 2024
Is Cavalleris de sa Repùblica – Pratza de Porta Manna in Aristanis at acasagiadu sa festa in ocasione de su de 78 anniversàrios de sa fundatzione de sa Repùblica, a ue ddoe ant pigadu parte autoridades polìticas e militares, cun amministradores e tzitadinos lòmpidos dae totu sa provìntzia.
Comente a onni annu, sa manifestatzione previdiat in programma sa tzerimònia de cunsigna de is onorificèntzias a is Cavalleris de sa Repùblica noos, nominados dae su Presidente de sa Repùblica pro meressimentos particulares in setores diferentes.
Ant premiadu: a su maistru de pianoforte Nicola Piredda “pro s’impignu suo in s’isparghidura de sa mùsica”; a s’istudiosu de sa Sartìllia Maurizio Casu “pro su progetu Monumentos abertos”; a su geòmetra Salvatore Vinci, pro is 87 annos dedicados a sa professione e a sa formatzione de is giòvanos.
Ancoras, un’àteru reconnoschimentu pùblicu est tocadu a s’assistente capu de sa Politzia Daniele Rocchi “pro is fainas suas in favore de is pipios in dificultade”; e a s’ingennieri e dirigente de is Vìgiles de su fogu apenas andadu in pensione Fabio Sassu pro “una vida dedicada a agiudare e a sarvare a is persones in dificultade; una vida dedicada a su istare bene de totus”.
A is Cavalleris noos ddos at premiados su prefetu Salvatore Angieri, paris cun su cuestore Giuseppe Giardina, cun su cumandante de is Carabineris Steven Chenet, de sa Capitaneria Federico Pucci, de sa Guàrdia de Finàntzia Giancarlo Sulsenti, e cun is sìndigos de Aristanis e Crabas, Massimiliano Sanna e Andrea Abis.
Su 2 de làmpadas, in Nùgoro, a un’àteru aristanesu dd’ant fatu Cavalleri de sa Repùblica: su reconnoschimentu est tocadu a s’ingennieri Antonio Angotzi, ex funtzionàriu tècnicu de su Corpus natzionale de is Vìgiles de su fogu. Angotzi est intradu a fàghere parte de is Vìgiles de su fogu in su 1982 e at otentu incàrrigos meda, faghende servìtziu in Nùgoro e in Aristanis.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.