Novas Aristanesas, giòbia 6 de làmpadas de su 2024

Una coa de chida de sole e de addòbios in provìntzia de Aristanis – Sunt medas is apuntamentos in provìntzia de Aristanis in custa coa de chida chi at a èssere piessignada dae su sole e dae temperaduras chi s’ant a acostare a 40 grados.

Cumentzamus cun sa mùsica: chenàbura a merie in Aristanis ant a fàghere sa de duas mesu-finales pro is seletziones pro sa Sardigna de sa Arezzo Wave, su fèstival musicale contest live chi dae su 1987 nche at fatu artziare a su palcu de sa tzitade toscana sa bellesa de 52.160 intra de cambaradas musicales e solistas. S’apuntamentu est semper in Contea, in s’àrea pro is cuntzertos de arborada de sa Repùblica, a is noe oras de merie.

In Crabas, imbetzes, domìnigu 9 de làmpadas ddoe ant a fàghere su de tres moto-addòbios contivigiadu dae su Motoclub Gigantes Bikers. S’apuntamentu est a is noe oras de mangianu in s’ititurismu Sa Pischera de Mari de Pontis e, a pustis de sa serrada de is iscritziones a mesudie, at a cumentzare su giru turìsticu. A sa faina ddoe ant a pigare parte fintzas is apassionados de màchinas antigas de sa cambarada Evil Garage.

Su moto-addòbiu at a acabbare cun unu pràngiu a cumone, a sa una e mesu, e a pustis ddoe ant a èssere is premiatziones e mùsica bella pro totus. S’ispetàculu ddu presentat Mariangela Puddu, autora de su libru “Segretos chi non faghet a cunfessare”.

Semper domìnigu ddoe at un’apuntamentu nou in cumpangia de sa rassigna “PaesArci” chi ocannu s’at a fàghere in Tzruàbara, in sartu de Marrùbiu, a pees de Monte Arci. S’at a cumentzare a mangianu chitzi, a is 9.00, cun “Cùrrere in s’Istòria”, sa gara de atlètica lèbia intra de is monumentos marrubiesos a incuru de s’Atlètica Monte Arci (FIDAL). A is 11.00 ant a cumentzare is laboratòrios e ant a abèrrere is paradas paris cun Forestas e Federcarni, mentras a sa una s’ant a pòdere tastare is màndigos de bia cun Carni DOC, faina contivigiada dae sa Pro Loco de Marrùbiu, dae Fercarni e dae sa Panga Mùrgia.

Ma non ddoe at a àere mandiares ebbia, ma fintzas archeologia cun bìsitas cun acumpangiadore a merie, pro connòschere mègius su Praetorium romanu de Is Bàngius. In cue etotu, in fines, a is ses de merie, s’at a pòdere bufare un’aperitivu gazosinu cumbidadu dae sa Cantina Quartomoro.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.