Novas Aristanesas, mèrcuris 22 de maju de su 2024

Sa provìntzia de Aristanis si preparat a s’istajone de su fogu – Creschet in provìntzia de Aristanis su pistighìngiu pro s’istadiale pro more de su perìgulu de su fogu.

Una timoria cumpartzida dae is sìndigos de sa provìntzia in ocasione de un’addòbiu fatu in sa Prefetura de Aristanis, presente su prefetu Salvatore Angieri, s’amministradore istraordinàriu de sa Provìntzia Massimo Torrente, is ghias de is Fortzas de s’òrdine, de sa Politzia Istradale, de su Cumandu provintziale de is Vìgiles de su Fogu, de sa Capitaneria de Portu, de Anas, de sa Diretzione generale de s’Amparu tzivile, de su Corpus forestale, de Forestas, de RFI e de su Cunsòrtziu de Bonìfica.

Is amministradores ant fatu un’apellu a su prefetu Angieri, domandende-ddi de apretare sa Regione pro pònnere resursas noas pro sa campànnia contras de su fogu de ocannu, ponende personale, mezos e dinari pro is Cumpangias barratzellares de is biddas.

Su prefetu at cunfirmadu s’impignu suo pro apretare sa Regione, ma at racumandadu a is sìndigos de si-nde incurare de su contivìgiu de is logos. “S’istadiale, cun is temperaduras artas meda”, at naradu su prefetu Angieri, “est perigulosa meda in provìntzia de Aristanis, in ue si diant pòdere connòschere emergèntzias pro more de s’arriscu de su fogu”.

Pro su chi pertocat is mezos, sa provìntzia at a pòdere tènnere unu de is elicòteros Superpuma, chi dd’ant a assinniare a sa base de sa Forestale de Fenosu. Dd’at cunfirmadu su consigieri regionale lussurzesu Diego Loi, chi narat chi no est berus chi in su territòriu nostru no amus a tènnere mezos aèreos.

S’assessora regionale Rosanna Laconi at naradu in is dies passadas chi in Sardigna amus a tènnere a disponimentu sete elicòteros, tres Canadair de s’Amparu tzivile e 1.100 mezos a motore. Intra de custos fintzas is trintasès pick-up Ford Ranger noos, chi in custas dies imbenientes ddos ant a cunsignare a is servìtzios territoriales de Forestas de totu  s’Ìsula.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.