Is parchègios in su mare de Crabas e de Santeru – In provìntzia de Aristanis “istadiale” cheret nàrrere dies de mare in is prajas de sa costera, ma comente a ònnia annu su portafògiu de is bagnantes depet fàghere is contos cun is parchègios a pagamentu de is prajas.
Cun su mese de làmpadas chi est intrende, is Comunes de Crabas e de Santeru amegant de si preparare pro sa gestione de is parghègios in colore biaitu.
Mancari no apant detzididu ancoras una data ufitziale, su sìndigu de Crabas Andrea Abis at fatu a ischire chi si diat pòdere cumentzare a pagare giai dae sa coa de chida de s’8 e su 9 de làmpadas.
In custas dies su Comune est cuncordende is funes pro sa marcadura de is parchègios e est istabilessende is tarifas. “Is prètzios pro parchegiare no ant a incarire”, at naradu Abis. “E custu mancari is ispesas pro su Comune de Crabas siant crèschidas. In antis de s’incarreru de is parchègios a pagamentu amus a bogare sa campànnia pro is abbonamentos, chi si podent comporare in lìnia o in is isportellos a s’aposta”.
Intra de is ispesas chi su Comune ddoe at dèpidu parare fronte pro s’istajone noa, ddoe est s’assentu de is dòcias e is gabinetos de Is Arutas, chi est costadu 70.000 èuros.
Santeru puru depet parare fronte a is costos pro su contivìgiu de is prajas suas, de tale manera chi ocannu a su Comune dd’est tocadu a crèschere is tarifas de is parchègios de su 20% siat pro is màchinas, siat pro is càravan. Una die passada in mare at a costare, duncas, 8 èuros, mentras is biagiadores a càravan ant a pagare 12 èuros. Is bagnantes s’ant a pòdere serbire de gabinetos cun miradores e de su servìtziu dedicadu a is camper.
“Custu determinu est su resurtadu de un’analizu fungudu de is costos de gestione, de is intradas comunales e de is pagamentas. Su chi intrat dae is parchègios serbit pro pagare sa regorta de s’àliga, chi est incarida cussa puru”, at naradu Luigi Tedeschi, sìndigu de Santeru. “Ca si nono, custas ispesas ddas diant dèpere pagare is santeresos, chi no si podent fàghere càrrigu de is costos de gestione de is prajas”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
