Novas Aristanesas, lunis 13 de maju de su 2024

Novas Aristanesas, lunis 13 de maju de su 2024

Mèigos e pediatras noos in provìntzia de Aristanis – Intra de is dificultades meda chi amegat de connòschere sa sanidade pùblica, una a manera particulare ponet pistighìngiu a is biddas de sa provìntzia de Aristanis: sa mancàntzia de mèigos de base e de pediatras a sèberu lìberu.

Si, pro parare fronte a custa farta a dolu mannu bastante isparta, sa Asl 5 at incarreradu su progetu de is ambulatòrios istraordinàrios territoriale de comunidade, est a nàrrere is ASCoT, is tzitadinos sunt in chirca de rispostas de dura e isperant de pòdere torrare a seberare a lestru a su mèigu issoro.

In su mese de maju, sa Asl 5 at fatu a ischire s’intrada in servìtziu de professionistas meda. Su primu arribadu est unu mèigu de base nou a Marmidda: dotora Francesca Serra, difatis, at detzìdidu de abèrrere is ambulatòrios suos in Abas e in Assou.

Chida passada est lòmpida sa nova bella de s’assignatzione de bator seas de pediatria a sèberu lìberu in su territòriu de sa Sienda sanitària aristanesa.

A su setore 1 ddoe ant a arribare dotora Simona Cusano e dotora Stefania Frascaro, chi in antis de atzetare custu incàrrigu nou traballaiat in Monteferru. Custas pediatras si-nd’ant a incurare de is malàidos de Aristanis, Crabas, Prammas, Santa Justa, Siamanna, Siapicia, Simaghis e Biddobrana.

Is biddas de Arborea, Marrùbiu, Arcidanu, Terraba e Uras, chi formant su setore 5, ant a pòdere gosare de sa presèntzia de dotora Francesca Corrias, chi immoe est mèigu titulare a pustis chi aiat leadu s’incàrrigu a manera provisòria. In su setore 7 at a pigare servìtziu, imbetzes, sa pediatra Francesca Demelas, chi at a èssere a disponimentu de is biddas de Gonnacodina, Gonnostramatza, Masuddas, Mòguru, Pompu e Siris.

S’ùrtima nova bella pertocat a is tzitadinos de su setore 1.3, a ue ddoe at a arribare unu mèigu de base nou. Dotora Maria Francesca Sanna, difatis, at a cumentzare su servìtziu oe in is ambulatòrios de Aristanis e Santa Justa.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.