Novas Aristanesas, chenàbura 17 de maju de su 2024

Sa provìntzia de Aristanis e is consìgios comunales de is pitzocheddos – In provìntzia de Aristanis amegant de nàschere unu muntone de Consìgios comunales de is pitzocheddos. Intra de custos ddoe est su de Prammas, chi s’est aposentadu su 22 de martzu, ghiadu dae su sìndigu Daniele Camedda, de sa classe I G de is iscolas mèdias e dae sa vitzesìndiga Michela Lilliu. Nde faghent parte Ilaria Atza, Leonardo Cadoni, Gabriele Antonio Carta, Gabriele Daga, Viola Frau, Filippo Meloni, Alex Mereu, Andrea Pavanetto, Luca Pinna e Chiara Piras. Su Consìgiu tenet unas cantas tareas, comente a s’ismanniamentu de is servìtzios de sa ludoteca e de sa biblioteca, ma fintzas su de si-nde incurare de is chistiones de s’ambiente e de is persones prus dèbiles, su de cuncordare dies ecològicas e de sensibilizatzione.

In Busache, imbetzes, su Consìgiu comunale de is pitzocheddos ddu ghiat Elisa Fadda, elègida in s’iscola primària de Fordongianus su 27 de martzu. Paris cun issa, nde faghent parte is consigieris Gaia Caboni, Alessia Cocco, Viola Concudu, Nicola Cossu, Matteo Espis, Stefano Fadda, Davide Frongia, Luca Masala, Virginia Masala, Mauro Mele, Francesco Solinas e Matteo Tiddia.

Su 7 de maju s’est fata sa tzerimònia de aposentamentu de is sìndigos e de is Consìgios comunales de is pitzocheddos de Tzeddiani, Santeru e Bauladu. A Fabio Olias dd’ant fatu sìndigu de is pitzocheddos de Tzeddiani, paris cun is dòighi consigieris de is tres biddas: Sophia, Giuseppe, Viola, Mattia, Davide, Francesco, Diego, Francesco Tommaso, Samuele, Riccardo, Ines, Viola Maria.

Aristanis puru tenet su Consìgiu comunale de is pitzocheddas e pitzocheddos, cun unu sìndigu piticheddu e una Giunta comunale. Sa tzerimònia de aposentamentu dd’ant fata su 15 de maju in sa sala de su Consìgiu comunale de is mannos, in su Palàtziu de is paras Iscolòpios. Sa fasca a tres colores dd’ant assignada a Davide Piras, de sa segunda mèdia de arborada de Marconi. Su vitze-sìndigu est Gabriele Casu, mentras sa presidente de su Consìgiu est Aida Salis. In sa Giunta comunale ddoe sunt solu fèminas, cun is assessoras Emma Boasso, Emma Turnu, Denise Niola, Matilda Antonazzo e Linda Su Ya Jing.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.