Sa cumbata contras de s’àliga in provìntzia de Aristanis – Mancari sa provìntzia de Aristanis siat intra de is provìntzias prus virtudosas de s’ìsula pro su chi pertocat sa regorta seberada, a dolu mannu acontesset a fitianu de bìere muntones de àliga abbandonada peri is sartos e in is oros de is rios. Po more de sa pagu finesa de medas, logos chi diant pòdere èssere ammajadores gràtzias a sa natura ìnnida chi ant allogadu si fùrriant a èssere muntonàrgios in logu abertu.
Est su chi acontesset in Su Pallosu, in sa marina de Santeru, in ue una barca betza abbandonada s’est furriada a èssere unu cascioneddu de àliga. A intro si ddoe agatat ònnia cosa: eletrudomèsticos piticheddos, comente a forrigheddos betzos, retzas pro piscare e istèrgios de plàstica, fintzas unu brasieri betzu e unu cantu de un’àtera barca.
In Ollasta puru, acanta de su ponte in sa Bia Provintziale n. 35, sa situatzione non paret mègius, ma gràtzias a s’impignu de is voluntàrios de sa bidda, ghiados dae su referente ollastesu de s’assòtziu ambientalista “Lìberos dae sa Plàstica”, Luciano Montanari, su logu nde-dd’ant iscaburtu dae s’àliga.
In tres dies, difatis, nd’ant boddidu 700 chilos de àliga. Ddoe aiant lassadu fintzas ischermos de computer, bidet, televisores betzos, unu coberi-setzidòrgiu pro màchina e bestimenta de ònnia genia, iscarpitas betzas e roba de muda.
S’impignu de is tzitadinos marmiddesos pro lassare pulidu su logu, però, amegat de crèschere semper de prus. A prus de Ollasta, s’assòtziu ambientalista amegat de traballare fintzas in Useddus e in Abas, in ue ddoe ant cuncordadu unas cantas fainas. E, a pustis chi dd’ant dèpida transire, una die de traballu amegant de dda cuncordare fintzas in Aressa.
Useddus, in prus, at fatu unu passu de importu e sa pròpia cosa no at a istentare a dda fàghere Ollasta: su Comune at firmadu unu protocollo de acòrdiu cun “Lìberos dae sa Plàstica” pro s’impignare in sa cumbata contras de s’abbandonu de s’àliga. Ollasta dd’at a firmare in ocasione de sa Sagra de su Laore, chi dda cuncordant su mese chi intrat. At a èssere una die in ue s’at a pònnere paris su connotu cun sa promissa de gherrare pro unu mundu prus pulidu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
