Novas Aristanesas, giòbia 11 de abrile de su 2024

Una coa de chida de addòbios – In provìntzia de Aristanis sa coa de chida est rica meda de addòbios. In Neoneli, chenàbura 12 de abrile, sighit sa rassigna in sa Domo de sa Cultura, cun un’addòbiu de sa filera “Sardas e sardos nòdidos” dedicadu custa borta a sa figura de Ninetta Bartoli. In Aristanis, imbetzes, sa pròpia die, Consuelo Pinna presentat su libru suo “Secreta mundi” in s’Unla. Ddoe pigat parte Paola Pennisi, mentras is leghiduras ddas contivìgiat Paolo Vanacore.

S’incràs, sàbadu 13 de abrile, in su “De Castro”, ddoe ant a fàghere un’addòbiu de orientamentu post diploma pro is istudiantes cun disabilidade de su territòriu, mentras s’Istitutu “Othoca” afestat is 50 annos suos cun un’addòbiu intra de passadu, presente e tempus benidore paris cun is dischentes betzos, cun is insegnantes e cun su personale ATA chi no est prus in servìtziu. Semper in Aristanis, dae is duas e mesu de merie, in su Palàtziu de s’isport de Sa Rodia ddoe ant a èssere 340 atletas sardos pro sa prima editzione de su Trofeu “Lionora de Arbaree” de patinàgiu artìsticu a rodeddas. A merie, in su teatru Santu Martinu, ddoe at a èssere sa projetzione de su documentàriu “Donbass. Eris, oe e cras”, cuncordada dae sa setzione de Aristanis de Democratzia Soberana e Populare. Sa die a pustis, semper inoghe, Simona Piras presentat “Imprassa-mi a forte e … faeddamus!”, pro regordu de su fìgiu. In Crabas, imbetzes, in sa Biblioteca comunale, s’iscritore Alessandro De Roma, paris cun Sabrina Sanna, presentat s’ùrtimu romanzu suo “Picnic in Kenwood House”.

Addòbios fintzas in Siamanna, pro iscobèrrere su Monti Grìghini e is màndigos de su connotu gràtzias a “Connoschimus su logu”, faina cuncordada dae sa Pro Loco, in programma pro domìnigu 14 de abrile. Semper domìnigu, intra de pedras fitas e domus de janas de Sant’Antoni, apuntamentu cun s’ùrtima passigiada de “Passeg … Giare”, e in su campusantu monumentale de Aristanis, cun su de duos apuntamentos de sa rassigna “Dae is Sepurcros: contos e personàgios de Aristanis” paris cun su Fai. In Bonàrcadu ddoe est in programma “Froridura de sa cherèsia”, una die pro connòschere sa Natura intramesu de màndigos bonos e cosas bellas de su territòriu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.