Novas Aristanesas, chenàbura 26 de abrile de su 2024

Dae su Ministeru mìgias e mìgias de èuros pro is patrimònios istòricos de sa provìntzia – Sunt medas is logos archeològicos de sa provìntzia de Aristanis chi ant a gosare de is 11 milliones de èuros postos dae su Ministeru de sa Cultura cun su programma triennale de is traballos pùblicos 2024-2026.

Ocannu etotu unos 60.000 èuros ant a serbire pro pònnere in seguresa sa cobertura de sa crèsia Su Monte in Sorradile. Marrùbiu, imbetzes, at a dèpere abetare fintzas a su 2025 pro is primos 130.000 èuros pro s’acontzu de su Praetorium e de su fàbbricu termale de Muru is Bàngius. In su 2026 ant a arribare àteros 140.000 èuros. A Gonnosnò puru su dinari at a arribare ocannu chi benit: 100.000 èuros ant a serbire pro s’acontzu de su putzu sagradu de Santu Sarbadori.

Unu finantziamentu de 200.000 èuros, partzidu in is duos annos 2025-2026, at a arribare pro su logu archeològicu de su nuraghe Losa de Abbasanta; mentras su nuraghe Santu Miali de Pompu nd’at a retzire 300.000 in sa pròpia simana pro traballos de ponidura in seguresa e pro ddoe fàghere àteros iscavos.

In custos tres annos Assou at a pòdere gosare de 300.000 èuros pro pònnere in seguresa s’iscavu in Santa Luxia. A Bidoniu ddoe ant a arribare 100.000 èuros in su 2025 e 2026 pro s’acontzu de su fàbbricu oru oru de su lagu Omodeo. Sa bellesa de 150.000 èuros ant a tocare, imbetzes, a Crabas pro s’acontzu de sa cresiedda de Santu Giuanni de Sinis.

Ocannu chi benit a Terraba ddoe ant a arribare 10.000 èuros pro s’assentu de sa Pretura betza, mentras Aristanis at a gosare in su 2025 e 2026 de 70.000 èuros pro sa còmpora de tres mòdulos de eletro-archìvios a pranos furriadores.

Dae su Ministeru lompent fintzas 570.000 èuros pro interventos de allogu de su patrimòniu archeològicu de sa Tzitade metropolitana de Casteddu e pro is Provìntzias de Aristanis e de su Sud de Sardigna.

Siat pro sa provìntzia de Aristanis e siat pro sa provìntzia de su Sud de Sardigna si prevident 450.000 èuros in is tres annos pro s’acontzu de su patrimòniu architetònicu. Pro su patrimòniu artìsticu in arriscu de si pèrdere, imbetzes, ant postu 200.000 èuros. 

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.