Novas Aristanesas, mèrcuris 6 de martzu de su 2024

Unu pranu de sa Coldiretti contras de is sirbones – Depopulamentu, ismèngua de is dannos e ismèngua de sa ratza: sunt custas is tres punnas de su Pranu nou de sa Coldiretti de Aristanis pro parare fronte a is dannos a is cultivos e a is siendas ingendrados de is sirbones

Aprovadu dae sa Regione, a pustis de su parre positivu espressadu dae s’Ispra, su Pranu immoe amegat de ddu castiare sa Provìntzia. Previdet una filera de fainas cumentzende dae ocannu fintzas a su 2026.

Pro su chi pertocat s’ismèngua de sa populatzione de is sirbones, su Pranu previdet tres fainas. Sa prima est de genia ecològica, cun s’impreu de retes e de deterrentes acùsticos e de fragu in is logos in ue bivent.

Sa de duas punnat a s’ismèngua de sa populatzione sena de ddos ochìere, ma cassende-ddos e tramudende-ddos a àteros logos o ismenguende sa fertilidade issoro. S’ùrtima faina previdet maneras prus crispas de isperdimentu, est a nàrrere sa ochimenta de is animales, sighende is inditos de is autoridades chi règulant sa cassa.

Segundu is contos de sa Coldiretti, in provìntzia de Aristanis sunt arribados in is ùrtimos chimbe annos 348 mìgia èuros de indennizos pro dannos ingendrados dae is animales arestes, e de custos 226 mìgia èuros pro dannos fatos dae is sirbones. Is cussòrgias chi sufrint de prus pro more de sa presèntzia de is sirbones sunt su Sinis e su Monteferru. E non mancant is intzidentes ingendrados dae sa presèntzia de custos animales, chi in su 2022 sunt istados prus de otanta.

“Bortas meda in su tempus passadu amus denuntziadu sa farta de fainas pro chircare de regulare sa presèntzia de sa fàuna areste, chi at fatu a manera chi is animales esserent pòdidu crèschere de nùmeru e fàghere dannos mannos a is cultivos”, narant Paolo Corrias e Emanuele Spanò, presidente e diretore de sa Coldiretti Aristanis. “Sa de s’aprovu de su Pranu est una nova bella. Tenet però bisòngiu de dd’acumpangiare cun fainas cuncretas chi permitant de parare fronte a custos problemas chi durant oramai dae annos e annos”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.