Novas Aristanesas, mèrcuris 27 de martzu de su 2024

Sa provìntzia de Aristanis, terra de grandos isportivos – Sunt semper de prus is sutzessos isportivos otentos dae is atletas de sa provìntzia de Aristanis: intra de canotàgiu, pallavolo, artes martziales e currera, is isportivos de sa provìntzia nostra si sèberant pro s’abilesa issoro.

Cumentzamus cun sa bìnchida de su cadderi aristanesu Gianleonardo Murruzzu e de fìgia sua Marta in is trivas de sàrtiu de is impèigos, prima tapa de su trofeu de is Nuraghes e Brevetos acasagiadu dae s’impiantu de Abbasanta. Babbu e fìgia ant conchistadu, pro su chi pertocat a onniunu, su de tres iscaleris de su palcu de su Grandu Prèmiu Fise Sardigna e su primu postu in sa classìfica de acabbu Brevetos.

S’iscuadra Judo Terraba at otentu unu muntone de medàllias in su Trofeu Tzitade de Rosignano, intra de custas ses de oru, tres de prata e una de brunzu. Ma sunt medas fintzas is prèmios otentos dae s’atleta marrubiesa Chiara Statzu in is Suds Trisome Games, in Antalya, sa triva multidisciplinare de primore a ue ddoe pigant parte persones cun sìndrome de Down. At bintu sa de bator medàllias de oro in is trivas de atlètica lèbia.

Su botziconeri calabresu Ruben Ferrari sighit a regòllere sutzessos s’unu in fatu de s’àteru: a pustis de sa bìnchida in is campionados sardos de Sarrocu, at otentu duas bìnchidas in sa categoria Junior 63 chilos in is cualificatziones pro is finales de su Campionadu italianu. S’atleta de sa Corner Gym Boxe de Aristanis at a bolare a is finales de su 18, 19 e 20 de abrile, chi s’ant a fàghere in Chianciano.

Una bìnchida in domo pro s’atleta aristanesu Massimiliano Serra de is Runners Aristanis, chi at conchistadu su primu postu pro su de duos annos paris in su Cross de Santu Giuanne de Frores, acasagiadu in sa tzitade sua. Is primos prèmios in sa categoria maschile sunt totu pro is Runners de Aristanis: a palas de Massimiliano Serra, difatis, sunt arribados Gian Marco Passiu e Gabriele Sechi.

In fines, arribamus a is bìnchidas de Stefano Oppo in su de 38 Memorial “Paolo d’Aloja”. A loba cun Gabriel Soares, s’atleta aristanesu at conchistadu duas medàllias de oro in is pesos lèbios addopiados.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.