Novas Aristanesas, martis 5 de martzu de su 2024

Novas noas dae is bias de sa provìntzia de Aristanis – Unu muntone de novas nde sunt essidas a pìgiu in custas dies in contu de is bias de sa provìntzia de Aristanis: intra de foradas, isfossonamentos e serradas pro traballos, is automobilistas depent donare atentu mannu cando ddoe passant.

Sa nova prus abetada dae una pariga de chidas fiat sa de s’abertura noa de su ponte de su Remèdiu, in ue ddoe ant fatu traballos pro remplasare tres giuntos de isciamplamentu. Chimbe dies in antis de su chi aiant istabilèssidu, su ponte e sa tzircunvallatzione de Sibì ddos ant torrados a abèrrere a su tràficu eris, cun allèbiu mannu de is chi impreant cussu tretu de bia pro nde essire dae su cabu-logu e andare cara a is fratziones de Donigala e Nuraxinieddu.

Una sinnaladura est lòmpida pro sa bia provintziale 97 chi portat a su portu de Aristanis – Santa Justa, chi s’asfaltu est giai dae ora prenu de foradas: nde ischint carchi cosa una roda e una gomma de sa màchina de un’ingennieri casteddaju, chi no nch’est renèschidu a evitare sa chi cun su tempus s’est furriadu a èssere un’isperefundu. Dd’est tocadu a cuncordare sa roda de iscorta proe-proe e a si nche torrare a andare a domo.

E s’abba de custas dies at peoradu sa situatzione in logos meda de sa provìntzia de Aristanis. Eris a mangianu a is Vìgiles de su fogu ddis est tocadu de intervènnere pro duos isfossonos. Su primu interventu dd’ant fatu in sa bia provintziale 15, intra de Santu Lussurzu e Bonàrcadu, pro more ca nd’est rutu unu murigheddu a sa bia.

S’àteru dd’ant fatu a pagu tretu dae sa borgata de Santa Caderina: a s’istatale 292 ddoe at arribadu unu frùmene de ludu e de pedra.

Ma sa temporada de custas dies passadas at fatu dannos fintzas in is bias provintziales n. 57, intra de Tiria e Santu Chìrigu, e n. 18, in su tretu acanta de Pardu Nou. Is foradas mannas chi ddoe fiant si sunt fatas gorropos prenos de abba, perigulosos meda pro is automobilistas chi ddoe passant.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.