Novas Aristanesas, martis 26 de martzu de su 2024

Is traballos de su Comune de Cùglieri – Sunt medas is traballos de su Comune de Cùglieri chi sunt incarrerende o chi sunt in progetatzione: protagonistas sunt is borgatas marinas.

Comintzende dae S’Architu, nòdidu pro sa praja sua cun s’arcu naturale. Pro custa borgata dae annos meda ddoe at un’atentu particulare: proibida s’intrada a sa praja in su 2009 pro more de s’arriscu de isderrocos dae sa trempa de rocas, in su tempus benidore si diat pòdere torrare a abèrrere gràtzias a unos cantos interventos de megioru de sa seguresa.

Comente at naradu su sìndigu Andrea Loche, est acabbada bene sa cunferèntzia de is servìtzios chi at aprovadu is traballos in sa costera de rocas, traballos chi prevident su cuncordu de traessas de atzàrgiu, sa prantadura de matedu nou, su cuncordu de prados armados e s’acontzu de is pilotàgios chi ddoe sunt.

Intra de is àteraos traballos pro S’Architu, si previdet su faghimentu de un’intrada noa in sa parte nord. Sa biighedda de collegamentu dd’ant a fàghere in s’Istatale 292: in custa manera is bisitadores chi arribant dae Cùglieri e dae su nord de s’Ìsula no ant a dèpere passare prus in s’Istatale fintzas a s’ùnica intrada chi ddoe est in sa borgata.

In su progetu ddoe est fintzas su fràigu de unu parchègiu pro màchinas e camper, de una tunda e de una tzircunvallatzione.

In s’Istatale 292 ddoe sunt acontèssidos a dolu mannu intzidentes meda. Pro cussu, intra de is progetos de su Comune de Cùglieri, ddoe est fintzas su cuncordu de unu mesuradore de velotzidade firmu acanta de su distribudore de Santa Caderina de Pitinuri.

“In prus, semus chirchende de risòlvere sa situatzione de su parchègiu in Santa Caderina e cussa de s’intrada a su mare de Is Arenas”, at atzuntu su sìndigu Loche. “Amus cunsignadu sa calada a su mare de Turre de su Putzu e tenimus giai su finantziamentu pro acontzare su lassinadòrgiu de Santa Caderina. Semus traballende pro is borgatas e, immoe, a bellu a bellu, carchi resurtadu comintzat a si bìere giai”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.