Is impignos meda de is pitzocheddos de iscola – Sunt medas is esperièntzias fatas dae is istudiantes de is iscolas aristanesas; a prus de is letziones, is istitutos proponent fainas meda pro afortiare su talentu de is pitzocheddos e pro fàghere crèschere su curriculum issoro pro su tempus benidore.
Dae su 4 a s’11 de martzu trintaghimbe dischentes de sa de tres classes de s’iscola segundària de primu gradu de bia de Marconi de Aristanis ant tentu manera de iscobèrrere sa tzitade de Sivìglia. A prus de is bìsitas a is logos de importu de sa tzitade, is dischentes ant pòdidu sighire unas cantas letziones de ispanniolu in sa grandu iscola Carlos V. Is pitzocheddos duncas ant retzidu una tzertificatzione linguìstica de livellu A2+.
Is istudiantes de sa classe 3 B de su Litzeu iscientìficu isportivu de s’Istitutu “Marianu IV de Arbaree” de Aristanis ant tentu manera, imbetzes, de s’incarare cara a su mundu de sa finàntzia cun su progetu “Economic@mente – Pone in contu su tempus benidore tuo”.
Fata dae s’Anasf a manos de pare cun sa sotziedade Progetica, sa faina previdiat una filera de letziones de educatzione finantziària chi pertocaiant su rispàrmiu. Is bator mòdulos propostos previdiant is simanas de is transatziones, s’indepidamentu, su de pònnere in seguresa su dinari, sa previdèntzia e sa programmatzione a tempus longu cun s’agiudu de unu consulente. In custa manera is pitzocheddos ant otentu is ainas utilosas pro parare fronte a is problemas de oe e de cras.
Impignos de importu pro su tempus benidore fintzas pro is pitzocheddos de s’Istitutu tècnicu industriale “Othoca”: in ocasione de s’addòbiu aristanesu de sa Die de su Traballu, is dischentes de sa cuarta F e cuinta G ant cuncordadu un’aplicatzione, chi at permìtidu a is bisitadores de tènnere sa mapa de is paradas in su telefoneddu.
Is reconnoschimentos sunt arribados luegos: is organizadores de sa Die de su Traballu ddis ant pedidu de cuncordare s’aplicatzione fintzas pro s’addòbiu casteddaju de sa faina.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
