Novas Aristanesas, lunis 11 de martzu de su 2024

Sas ùrtimas novas dae sa sanidade aristanesa – Assuntziones noas pro pediatras ma finas s’abertura de duos tzentros noos pro sos disturbos mentales e pro fàghere vìsitas nefrològicas gratùitas in s’ispidale Santu Martinu de Aristanis, cando b’at a èssere sa Die mundiale de su rungione. Custas sunt sas ùrtimas novas in contu de sa sanidade aristanesa.

Pro su chi pertocat a sos pediatras, in sa pàgina Internet de Ares Sardigna, a pustis chi sa Asl de Aristanis l’at pedidi, ant publicadu unu bandu istraordinàriu pro nche pònnere dotores cun preparatzione ambulatoriale de Pediatria e cosa gasi. S’incàrrigu at a èssere a tempus indeterminadu e previdet un’impignu de 38 oras a sa chida. Sos dotores cun custa cumpetèntzia si podent fàghere a in antis a intro de su 15 de martzu. S’Ares in custa manera est chirchende de dare risposta a sa mancàntzia manna de pediatras chi est ponende pistighìngiu in su territòriu.

Est creschende finas sa retza pro curare sos disturbos de sa memòria in totu su territòriu de sa Asl de Aristanis. Dae su 18 e dae su 19 de martzu ant a abèrrere in Terraba e in Abas sas seas territoriales de su Tzentru pro sos disturbos de sa memòria e pro sas infermidades mentales. Su Tzentru hub de Ilartzi, in custu momentu, at a coordinare su traballu.

“Sos patzientes noos devent bènnere a inoghe pro prenotare sa prima vìsita”, ispiegat su diretore de su distretu de Abas-Terraba, dotore Andrea Floris, “sos chi sunt giai in cura in Ilartzi los amus a ispostare a bellu a bellu a sas seas prus a curtzu a domo issoro, a tenore de sos bisòngios chi tenet onniunu”. In prus s’Asl n°5 tenet in idea de torrare a comintzare s’atividade finas in Aristanis, bidu chi at a imbàtere unu dirigente mèdicu nou.

In ùrtimu, s’istrutura cumplessa de Nefrologia e Diàlisi de s’ispidale Santu Martinu de Aristanis at a èssere a disponimentu de totus in sa Die mundiale de su rungione. S’apuntamentu est pro giòbia 14 de martzu e s’ant a fàghere controllos e collòchios pro parare fronte a sas maladias de sos rungiones, sena de pagare nudda e sena de prenotare. Sos controllos s’ant a fàghere sa die, dae sas noe a sa una (h 9,00-13,00) e dae sas duas a sas chimbe (h 14,00-17,00).

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.