Campagna Amica e sas iscolas – Sunt meda sas initziativas fatas dae Campagna Amica de sa Coldiretti in sas iscolas aristanesas, chi tenent comente a protagonista su màndigu bonu e s’educatzione alimentare.
Dae oe comintzat in s’Istitutu superiore “Don Deodato Meloni” de Aristanis su progetu “S’ògiu bonu”, unu caminu de informu, de tastadura e de nuscu pro iscobèrrere s’ògiu-ermanu.
Sos pitzocos de s’Alberghieru gasi ant a pòdere profundare sos impreos in coghina e sas particularidades territoriales de custu prodùsidu identitàriu. Sas fainas ant a sighire in sos mercados de produsimentos de s’agricultura e su 13 de martzu in s’Istitutu Cumprensivu 2 de Aristanis, cun sas classes primas de sas elementares.
“S’ògiu aunit totu sa Sardigna”, narat su Presidente de Coldiretti Aristanis, Paolo Corrias, “sos logos diversos de s’ìsula produint ògiu-ermanu de calidade, ma cun sabores diversos segundu su territòriu. Faeddamus de unu patrimòniu cun variedades meda chi esaltat sa bio-diversidade e acumonat su prodùsidu in sos piessignos organolèticos bonos meda”.
S’Istitutu “Don Deodato Meloni” e s’assòtziu promovent puru “Campagna Amica Gourmet”, su cuncursu eno-gastronòmicu riservadu a sos Istitutos alberghieros regionales.
Su 19 de abrile sos pitzocos s’ant a isfidare in s’Istitutu aristanesu a corpos de màndigos fatos cun arrosu de Sardigna. Sos grupos devent èssere cumpostos dae tres istudiantes chi frecuentant su de 3, 4 e 5 annos.
Su cuncursu est imbàtidu a sa de duas editziones: s’ingrediente protagonista de ocannu passadu fiat s’angione sardu IGP. Aiant bìnchidu sos istudiantes de s’Istitutu alberghieru de Tortolì.
“S’iscola rapresentat su logu ideale pro faeddare de s’importu de un’impreu cussentziosu in intro de sa dieta chi previdet prodùsidos friscos, de istajone e locales”, at congruidu su responsàbile regionale de Campagna Amica Coldiretti, Serafino Mura.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
