Novas Aristanesas, chenàbura 15 de martzu de su 2024

S’ou de s’Ail – Is sòtzios e is voluntàrios de sa setzione Ail de Aristanis si faghent torrare a bìere in is pratzas pro sa campànnia de bonucoro pro sa Pasca Manna 2024. S’arregorta de dinari, ocannu cun s’islogan “In ònnia ou ddoe at unu bisu, agiuda-nos a ddi pònnere cambas”,  est in programma dae oe, chenàbura 15 de martzu, a domìnigu 17 de martzu e bolet agiudare sa gherra contras de is leutzemias.

Chie at a seberare un’ou de s’Ail at a agiudare aici sa chirca iscientìfica in contu de is tumores de su sàmbene e is fainas de sensibilizatzione e informu de sa setzione aristanesa.

Sunt ùndighi is biddas de sa provìntzia de Aristanis in ue si podent comporare is oos de tzuculate de s’Ail. Custa est sa lista: chenàbura 15 e sàbadu 16 de martzu is voluntàrios ant a èssere in sa potecaria de Paulle. 

Pro totu e is tres is dies, is voluntàrios ant a èssere fintzas in Abbasanta, in pratza de Crèsia, in Ilartzi, in cursu de Umberto, in sa sea de sa Sotziedade Operaja de Agiudu Pare-Pare e in sa libreria Chiara e Stefy. Ma ant a èssere fintzas in Norghiddo, su 16 e su 17, in pratza de Crèsia.

Isceti sàbadu 16 de martzu su bangu cun is oos de s’Ail at a èssere presente in Bosa, in pratza IV de onniassantu; e, ancoras, in Busache, in sa potecaria in bia de sa Brigata Tàtari; in Santu Lussurzu, in sa potecaria in arborada de Azuni n. 175, e in Sune, in sa pratza de su mercadu n. 1.

Domìnigu 17 de martzu s’apuntamentu imbetzes at a èssere in Terraba, in pratza de sa Sea n. 3, e in Tzuri. In Aristanis su 15 de martzu is voluntàrios ant a èssere in s’ispidale, in arborada de sa Fundatzione Rockfeller, e su 16 de martzu in pratza de Porta Manna, su 17 torra in pratza de Porta Manna e in bia de Casteddu n. 426, in dae in antis de s’istangu.

In Aristanis sa setzione de s’Assòtziu italianu contras de is leutzemias, is linfomas e su mieloma, est nàschidu in su mese de nadale de su 2022, ghiadu dae Paolo Casula, ex primàriu de su servìtziu de Ematologia de s’ispidale “Santu Martinu”. Ocannu passadu s’assòtziu aristanesu aiat pigadu parte a sa faina de bonucoro chi, a livellu natzionale, est lòmpida a sa de trintunu editziones.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.