Novas Aristanesas, chenàbura 1 de martzu de su 2024

Crònacas de animales dae sa provìntzia de Aristanis – In is ùrtimas chidas sunt lòmpidas dae sa provìntzia de Aristanis unas cantas novas chi pertocant is animales.

Sa prima est de is dies de sa Sartìllia de Aristanis e pertocat Lady Blu, un’ebba sètzida dae unu de is cadderis de sa currera de Carrasegare. Su domìnigu Lady Blu si-nch’est fuida, currende a totu fua peri is bias de sa tzitade. Pro sorte manna unos cantos automobilistas nche sunt renèssidos a firmare s’ebba mùrtina e a dda torrare a su cadderi suo, chi at pòdidu aici torrare a si-nde incurare de s’animale.

Pagas dies a oe dae Pianalza est lòmpida sa nova de sa liberatzione de Ciuffo, su primu bentrùrgiu sardu chi nch’est renèssidu a sanare a pustis de un’intzidente de eletrocutzione.

A su pugione afarrancadore dd’aiant sucurtu in su mese de abrile de su 2023 is agentes de sa Forestale gràtzias a sa sinnaladura de su fotògrafu naturalista Uccio Saccu, impignadu in unu servìtziu in Pianalza: s’animale fiat in cunditziones bastante graves. Gràtzias a s’incuru de is òmines de Forestas chi traballant in su tzentru de recùperu de Bonassai, Ciuffo est sanadu de su totu. Su 22 de freàrgiu at pòdidu torrare a bolare in is chelos de Bosa.

S’ùrtima nova, trista, pro ite no acabbat bene, lompet dae Arriora. In custos ùrtimos meses in is bighinados acanta de s’iscola elementare sunt isparèssidos prus de 20 gatos, s’ùrtima una gatu bianca, bellighedda, chi is meres isperant de dda torrare a bìere.

E mancari unu residente in Arriora apat fatu una denùntzia a is Carabineris, no ant torradu a agatare a animale perunu: unu gatu isceti fiat furriadu a domo cun su tzugru totu iscorriadu, sinnale craru de maltratamentos. De sa chistione si-nd’est incuradu fintzas s’Assòtziu Italianu pro sa Defensa de is Animales de Milanu, chi at fatu a ischire de s’idea de presentare issu puru una denùntzia e de ofèrrere agiudu legale a is meres de is animales.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.