Is resurtados de sa Sartìllia e de sa Sartilliedda – In Aristanis est agabbadu s’apuntamentu prus abetadu de s’annu: sa tzitade, difatis, at saludadu sa Sartìllia e sa Sartilliedda.
Su Cumponidore de sa Sartìllia de domìnigu, cuncordada dae su Grèmiu de is Massajos, fiat Giovanni Utzeri, cun a costàgiu su segundu Andrea Zucca e su tertzu Paolo Faedda.
A pustis de sa bestidura in sa sea de su Grèmiu contivigiada dae is massajeddas Alice Franceschi e Angelica Pinna, cun sa mirada atenta de sa massaja manna Susanna Sanna, su Cumponidore at tramudadu a sa Sea de Santa Maria.
E, mancari su Cumponidore no nd’apat inferchidu nemmancu unu, sa currera est acabbada cun dòighi isteddos pigados. Nche sunt renèssidos Fabrizio Manca, Cumponidore de su martis, Claudio Tuveri, Daniele Mattu, Andrea Brai, Andrea Solinas e Elisabetta Sechi. E, ancoras, Luca Murtas, Salvatore Montisci, Tullio Zucca, Alessandro Cester, Emanuela Colombino e Andrea Manias.
Impignu mannu e figura bella fintzas pro su Cumponidoreddu de sa Sartilliedda de lunis: Luca Piras s’est seberadu pro àere inferchidu s’isteddu cun s’istocu e pro una remada ispantosa. In antis de issu, s’isteddu dd’aiant inferchidu àteros duos pitzocheddos e una pitzochedda: Elio Sanna, Giulia Atzei e Nicolò Pisu.
Is tres dies de festa manna sunt acabbadas eris, cun sa Sartìllia de is Maistros de linna. A Fabrizio Manca dd’ant bestidu a Cumponidore is massajeddas Angelica Picconi e Eleonora Manca, ghiadas dae sa massaja manna Tiziana Fanni.
A pustis de s’isteddu pigadu domìnigu, Fabrizio Manca eris non nd’at inferchidu àteros, ma sa currera est acabbada comente si siat cun un’incùngia de dòighi isteddos. Bator ddas ant conchistadas is amàsonas Elisabetta Sechi, Sonia Cadeddu e is sorres Antonella e Ilaria Rosa.
Is cadderis chi ant pigadu s’isteddu, imbetzes, sunt Enrico Fiori, Fabrizio Pomogranato, Alessio Garau, Anthony Maccioni, Rodolfo Manni, Cristian Matzutzi, Matteo Licheri e Andrea Concas.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
