Novas Aristanesas, martis 20 de freàrgiu de su 2024

Is binchidores de su Martis de coa e de su Marrulleri – Si in Aristanis su Carrasegare dd’ant afestadu cun sa Sartìllia, in Samugheo cun is màscheras de su connotu de A Maimone e in àters biddas de sa provìntzia cun baddos de is pingiadas, festas in màschera in pratza, durches de su connotu e garnatza, in is biddas de su Campidanu de Terraba protagonistas de su Carrasegare sunt istados is carros allegòricos, cun isfiladas longas a ue ddoe ant pigadu parte cambaradas de màscheras lòmpidas dae ònnia parte de Sardigna.

E duncas, in Terraba e Marrùbiu, ddoe ant cuncordadu duos addòbios de importu de su Carrasegare de sa provìntzia de Aristanis: su Martis de coa e su Marrulleri. 

Ocannu su Martis de coa terrabesu est andadu bene meda, cun una cambarada de gente ispantosa pro bìere is carros chi ant isfiladu peri is bias de sa bidda. Su primu prèmiu est tocadu a una truma in màschera de Terraba etotu, is Storpions: nàschida 25 annos a oe, at afestadu sa prima parte de bator de unu sèculu de vida, torrende a su primu annu e presentende su primu carru chi aiant bogadu, ma annoadu e assentadu a is tempos de oe.

Su de duos postos est tocadu a is Lillo Boys de Gonnos, chi ant presentadu unu tema acapiadu a is giogos e gioghitos de su connotu. Sa medàllia de brunzu est tocada, imbetzes, a su Magic Group, custos puru terrabesos, chi si sunt presentados pro sa prima borta ocannu cun unu carru chi faeddaiat de is paristòrias sardas, cun janas e gherradores atrividos. 

Dimìnigu est tocadu a s’ùrtima die de su Marrulleri de Marrùbiu, cun s’isfilada interprovintziale, cun is premiatziones de is carros mègius, e cun unu cuntzertu in pratza. Sa cambarada de is Storpions at bintu torra su primu prèmiu, mentras su de duos est tocadu a su Galaxy Team de Marrùbiu cun su tema “Opineddu” e su de tres a is Lillo Boys. 

A prus de is carros allegòricos ddoe finat fintzas cambaradas de màscheras a pee: su primu prèmiu dd’at bintu sa cambarada de s’Avis de Marrùbiu cun “Su stìddiu” e cun unu bòlidu de mariposas coloradas. A pustis ant premiadu Sa mata de is colovros e a Crazy Girl.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.