Novas Aristanesas, lunis 26 de freàrgiu de su 2024

Is traballos in su museu de Crabas e in s’Antiquarium de Aristanis – A pustis de duas dies de serrada, su Museu tzìvicu “G. Marongiu” de Crabas at torradu a abèrrere e s’at a pòdere bisitare gratis fintzas a s’inauguratzione de sa mustra noa de is Gigantes in sa sala de su Paesàgiu.

Sa serrada de su museu pro duas dies at permìtidu de ddoe fàghere unos cantos traballos finantziados cun su dinari de su Crp cun su “Progetu Mannu Mont’’e Prama”, pro s’abertura de su laboratòriu de acontzu didàticu chi at a contivigiare sa Sabap de Casteddu e Aristanis.  

E, semper in custas dies de serrada, nd’ant iscuncordadu sa mustra de is istàtuas de Mont’’e Prama comente dd’amus connota fintzas a oe, pro ddas pòdere cuncordare in sa sala de su Paesàgiu, in ue su bisitadore at a pòdere bìere is isculturas in sa tridimensionalidade issoro, paris cun totu is modelleddos de nuraghe chi s’agatant in su museu.

In s’Antiquarium Arborensu de Aristanis puru amegant de ddoe fàghere traballos de acontzu e de megioru. Su museu at a abarrare serradu pro su pùblicu fintzas a s’acabbu de is traballos, prevìdidos pro su mese de làmpadas.

Cumentzados su 18 de freàrgiu, is traballos prevident de annoare is salas gràtzias a unu progetu de 500.000 èuros de sa Fundatzione Aristanis, finantziadu cun su dinari de su Pnrr. Su progetu, fatu dae una cambarada de progetadores ghiada dae s’architetu Gianfranco Sanna paris cun is architetos Piero Frau e Mauro Tatti e cun sa Sotziedade Studio Azzurro, pertocat su megioru de tres cosas: is salas de su fàbricu, s’esperièntzia de impreu de is logos e, in fines, sa calidade de s’oferta de is mustras chi acasàgiat.

Ant a impreare materiales e tecnologias ecocumpatìbiles, respetende totu is paràmetros ambientales. S’annou de is salas de s’Antiquarium e de sa biblioteca sua ant a permìtere, in fines, de megiorare s’interessamentu de is iscolas e de is universidades, chi gosant giai de is ofertas culturales de su museu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.