Novas Aristanesas, lunis 19 de freàrgiu de su 2024

Servìtzios de importu in Marmidda Arta, Parte Montis e in su Campidanu de Terraba – Favorèssere s’impreu de su sardu in ònnia logu, agiudare sa gherra contras de su bullismu e de su cyberbullismu e agiudare a is persones no autosufitzientes pro is bisòngios issoro. Sunt tres is servìtzios pro is tzitadinos abertos in Marmidda, in Parte Montis e in su Distretu de su Plus de Abas e Terraba.

Su primu, s’isportellu linguìsticu, abertu in su Comune de Abas ma a disponimentu de is tzitadinos de dòighi biddas de Marmidda Arta, tenet sa punna de abbiatzare s’impreu de sa limba sarda e de fàghere crèschere is cumpetèntzias de comunicatzione in sardu de is faeddadores. Sa faina, incarrerada gràtzias a s’Avisu TULIS de sa Regione Sarda, dda contivìgiant is operadores de sa sotziedade cooperativa L’ALTRA CULTURA de Aristanis e at a tirare fintzas a su 30 de onniasantu. S’isportellu aberit dòighi oras a sa chida, su mèrcuris e sa chenàbura a mangianu dae is oto a is duas, ma is laboratòrios in is iscolas e in is bibliotecas s’ant a pòdere cuncordare fintzas in dies e in oràrios diferentes. S’isportellu faghet a ddu chircare andende-ddoe in persone, o telefonende a is nùmeros 0783/911350 – 349/6025986, o mandende un’e-mail a s’indiritzu [email protected].

S’àteru servìtziu, imbetzes, faghet parte de is fainas de su Plus de Abas e Terraba pro ismenguare is cumportamentos de bullismu e de cyberbullismu: un’isportellu de ascurtu virtuale pro is pitzocheddos de is 32 comunes de su Distretu. A intro de su progetu “No web isceti”, su servìtziu “S.O.S. bullismu e cyberbullismu” est un’agiudu bellu pro chie nche ruet in custa retza perigulosa. Is pitzocheddos ant a pòdere iscrìere unu messàgiu in sa pàgina de Facebook “Non web isceti Lab” o mandare un’e-mail a s’indiritzu [email protected] pro otènnere agiudu e consìgios bellos dae operadores espertos.

Su de tres servìtzios, in fines, pertocat a is persones chi non sunt autosufitzientes, semper in is 32 biddas de su Distretu sòtziu-sanitàriu de Abas e Terraba. Sa faina previdet a su mancus unu màndigu a sa die pro persones o famìllias in cunditziones malas de salude. Immoe at a tocare chi sugetos acreditados abèrgiant un’albu. Is operadores econòmicos cun is rechisidos prevìdidos dae su bandu podent presentare sa candidadura issoro a intro de mesudie de su 1 de martzu, mandende una PEC a s’indiritzu [email protected].

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.