Sa coa de chida in provìntzia de Aristanis – Ùrtimos apuntamentos in cumpangia de su Carrasegare in custa coa de chida: dae sa Marmidda a su Campidanu de Aristanis, custos sunt is addòbios chi non faghet a ddos pèrdere.
In Sabarussa est totu prontu pro s’isfilada de su Bingiateri 2024 de sàbadu 17 de freàrgiu: is bias de sa bidda oru-oru de su Tirsu s’ant a abbiatzare cun is colores de is carros allegòricos e cun is cambaradas de is màscheras a pee.
A pustis de su Carrasegare Sinesu, sàbadu a merie in Crucuris, in sa domo de is Pillonis, s’assòtziu turìsticu Pro Loco, cun s’agiudu de su Comune, cuncordat unu merie de festa in màschera, cun su baddu de is pingiadas pro is pipios e tzìpulas pro totus.
Semper sàbadu, ma in Ollasta (de Useddus), cumentzende dae is bator in sa palestra comunale, festa manna cuncordada dae sa Pro Loco cun giogos, su baddu de is pingiadas, sa tzipulada e babbu sardu. In Nureci puru, sàbadu 17, s’apuntamentu est imbetzes in su salone parrochiale cun su baddu de is pingiadas de sa Pro Loco in ue protagonistas ant a èssere is pipios, mentras sa festa in màschera at sighire pro totus, fintzas cun is premiatziones de acabbu.
A Marrùbiu amegant de ddoe arribare binti carros e dosinas e dosinas de cambaradas de màscheras pro sa de 44 editziones de su Marrulleri: domìnigu 18 de freàrgiu ddoe at a èssere s’isfilada peri is bias de sa bidda. In su càbudu de a in antis de s’isfilada ddoe at a èssere s’assòtziu culturale Tamborràrgios e Trumbiteris “Tzitade de Aristanis”. Sa festa at a sighire fintzas a su note, cun is premiatziones e cun sa mùsica de su dj Giorgio Prezioso. Is bisitadores ant a pòdere seberare intra de unas cantas propostas enogastronòmicas, cun màndigos de su connotu o cun paninos, chi s’agatant in is tzilleris e ristorantes e paradas peri is bias de sa bidda.
In fines, clima de festa fintzas in Ollasta (de Simaghis), cun su Carrasegare ollastinu, chi at a acabbare domìnigu 18 de freàrgiu in pratza de Santu Sebestianu cun su baddu de is pingiadas e cun unu muntone de prèmios chi nd’ant a rùere dae is pingiadas segadas. Su merie de festa dd’at a abbiatzare su trio folk Dilliriana, mentras sa Pro Loco at a ofèrrere tzìpulas acumpangiadas dae sa garnatza. Ma cosas bonas de papare e de bufare s’ant a pòdere agatare fintzas in sa barraca cuncordada dae sa Leva 1974.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
