Novas Aristanesas, giòbia 1 de freàrgiu de su 2024

Is cojas in crèsia – Pro is crèsias de s’Artzidiòtzesi de Aristanis su 2023 est istadu un’annu assortadu pro su chi pertocat is cojas. A pustis de s’ismèngua manna in is tres annos 2020-2022, in su 2023 su nùmeru de is còpias chi si sunt cojuadas in is crèsias de s’Artzidiòtzesi de Aristanis at connotu una crèschida manna: sunt istados, difatis, 135 is “eja” pronuntziados cun su ritu religiosu cunforma a is 103 de s’annu in antis.

Custos sunt is datos regortos dae sa Cantzelleria de s’artzipìscamu, ghiada dae munsennore Tonino Zedda. De su restu, però, est berus fintzas chi is nùmeros de sa simana in antis de sa pandemia fiant nùmeros meda, ma meda prus artos.

In su 2019, pro nàrrere, is cojas tzelebradas in crèsia sunt istadas sa bellesa de 380, nùmeru chi s’est abbassadu in su 2020 a apenas 23, pro more de s’òbrigu de isulamentu e inserru.

Su territòriu de riferimentu est ispartu meda: de s’Artzidiòtzesi arborensa nde faghent parte 85 parròchias. Nde faghent parte agiomai totu sa provìntzia de Aristanis, ma fintzas biddas meda de sa provìntzia de Nùgoro e de sa provìntzia de su Sud de Sardigna, in totu unos 150.000 tzitadinos.

In su 2023, is crèsias chi is isposos ant seberadu de prus sunt istadas sa basìlica de Santa Justa, sa crèsia de Santa Maria de Crabas, sa sea de Aristanis e sa basìlica de Nostra Sennora de su Remèdiu.

Dòighi còpias de isposos arribaiant dae foras de sa diòtzesi, una pariga fintzas dae su Rennu Aunidu, dae s’Ispagna e dae sa Germània. Casi semper sa pobidda o su pobiddu, ma a bortas ambos duos, fiant sardos e pro si cojuare ant detzìdidu de fàghere sa coja in sa terra issoro.

Un’àtera cosa chi nde essit a pìgiu est chi, de deghe cojas tzelebradas, sete sunt de genia concordatària. Is àteros isposos, imbetzes, si sunt cojuados in antis in còmunu e a pustis in crèsia. E, in s’interis, in Aristanis in custas chidas ant incarreradu unu cursu prematrimoniale contivigiadu dae is parròchias de sa tzitade: amegant de ddu sighire unas bindighina de còpias chi s’ant a cojuare ocannu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.