Is cuncursos pùblicos in provìntzia de Aristanis – Essint a campu unas cantas oportunidades de traballu gràtzias a duas seletziones bogadas dae duos entes de importu de sa provìntzia: sa Asl 5 e su Comune de Aristanis, chi amegant de chircare personale nou.
Sa sienda sanitària est chirchende a dirigentes mèigos, collaboradores amministrativos e a àteras figuras professionales cun bandos pro cuncursos pùblicos e mobilidade. A intro de lunis ant a dèpere presentare sa candidadura issoro is chi sunt interessados a su postu de collaboradore professionale sanitàriu logopedista e de dirigente mèigu in is disciplinas de Oncologia e Ematologia.
Ddoe at tempus, imbetzes, fintzas a su 16 de freàrgiu pro presentare sa candidadura pro collaboradore professionale sanitàriu tècnicu audiometrista e dirigente mèigu in is disciplinas de Otorinolaringoiatria e Maladias de s’aparatu respiratòriu.
A custos duos cuncursos, chi prevident seletziones chi pigant in cunsideru tìtulos isceti, si ddoe atzunghent duos avisos de mobilidade. Sa Asl est chirchende a unu collaboradore tècnicu professionale informàticu, chi at a dèpere presentare sa candidadura a intro de su 24 de freàrgiu, e a àteros duos collaboradores amministrativos professionales: pro custos postos sa domanda bolet mandada a intro de su 26 de custu mese.
Assuntziones meda fintzas in su Comune de Aristanis: cun una seletzione pùblica a esàmenes isceti, ant a pigare a tempus prenu e no istabilèssidu a batòrdighi istrutores amministrativos-contàbiles.
Chie est interessadu depet presentare sa candidadura cun sa prataforma InPA, su portale ùnicu de reclutamentu de s’Amministratzione Pùblica, a ue faghet a ddoe intrare cun s’identidade digitale. S’iscadèntzia est pro sa una de su 27 de freàrgiu 2024.
Intra de is rechisidos chi domandant, ddoe sunt su de tènnere a su mancus degheoto annos, su de tènnere su diploma de iscola superiore e sa connoschèntzia de sa limba inglesa e de is programmas informàticos prus nòdidos.
Totu is informos, is bandos e is inditos pro presentare sa candidadura siat pro is cuncursos de sa Asl 5 siat pro cussos de su Comune de Aristanis s’agatant in is pàginas istitutzionales de is duos entes.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
