Novas Aristanesas, lunis 15 de ghennàrgiu de su 2024

Sa Fundatzione Mont’e Prama e is progetos suos – Sa Fundatzione Mont’’e Prama de Crabas at serradu su 2023 cun nùmeros de record, comente nd’est essidu a pìgiu in un’addòbiu cun is òrganos de informu fatu chida passada, in ue ant presentadu fintzas is progetos pro su benidore.

A tenore de is datos regortos resurtat chi is billetes bèndidos a is bisitadores de su Museu tzìvicu “Giovanni Marongiu” de Crabas e de is àteros logos archeològicos gestidos dae sa Fundatzione sunt istados 156.071, cun una regorta de 661.065 èuros. Medas sunt istados is turistas istràngios, chi arribaiant prus che totu dae Fràntzia, Germània, Ispànnia, ma est crèschidu fintzas su nùmeru is bisitadores americanos (de is Istados Aunidos) e isvìtzeros.

Su 2024 at a èssere un’annu ispetziale pro sa Fundatzione: ocannu, difatis, s’at a afestare su de 50 annos dae cando aiant agatadu is Gigantes de Mont’’e Prama. Is gherreris mannos de pedra, oramai connotos e apretziados in totu su mundu, s’agatant in su Museu tzìvicu “Giovanni Marongiu” de Crabas.

A pustis de annos de isetu, dae su 2024 su Museu at a acasagiare is Gigantes in sa sala “Paesàgiu”, unu logu inauguradu in su mese de trìulas de su 2021. Pro s’ala noa dedicada a issos, imbetzes, s’at a dèpere abetare ancoras s’acabbu de is traballos.

Sa sala “Paesàgiu” in prus at a acasagiare sa mustra “Dae Mont’’e Prama a Nivola: 3.000 annos de pedra in Sardigna”, un’àndala in contu de s’istòria de Crabas.

Intra de is àteras novas acapiadas a sa festa in onore de is Gigantes si previdit fintzas s’abertura pro su pùblicu de unu laboratòriu de acontzu, in ue at a fàghere a cumprèndere mègius su traballu de is archeòlogos e istudiosos de sa Subraintendèntzia Abap de Casteddu, Aristanis e Sud de Sardigna.

Ma sa Fundatzione tenet fintzas un’àtera sorpresa: a prus de su sartu de Mont’’e Prama, s’at a cumentzare a chircare iscusòrgios noos in s’istàniu. E, si arribant is permissos chi serbint, sa Fundatzione at fàghere chircas fintzas in su logu preistòricu de Conca Illoni e in su logu nuraghesu de Cannevadosu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.