Iscolas de Aristanis intre disàgios, abbandonu e signalatziones
3 Novembre 2026
Novas Aristanesas, martis 3 de santandria de su 2026

S’iscola mèdia Leonardo Alagon
Novas Aristanesas, martis 3 de santandria de su 2026
Iscolas de Aristanis intre disàgios, abbandonu e signalatziones – Abba, pistazu, fragos malos e cortiles in ue non faghet a passare: in sas iscolas de Aristanis sunt meda sas signalatziones in contu de disàgios chi interessant istudiantes, famìllias e personale iscolàsticu. Dae carrera Marconi a su Sacro Cuore, a sos istitutos Alagon e Grazia Deledda, essint a campu crititzidades diversas, acomunadas dae sa rechesta de interventos pro garantire seguresa e igiene a chie s’iscola la vivet ogni die.
In s’iscola mèdia Leonardo Alagon, s’abba dae sa cobertura, chi fiant acontzende, at causadu allagamentos in su pianu de subra e in prus nd’at caladu pistazu, custringhende a nche ispostare carchi classe in sos curridòios. A pustis de una die de serrada, chenàbura passada s’istitutu depiat torrare a abèrrere, ma sos fragos fortes a pustis de sa sanificatzione ant custrintu sos dischentes a abarrare in fora, cun s’interventu de sos carabineris e de su sìndigu. In contu de custu sos cussigeris comunales de tzentru-sinistra ant presentadu un’interpellàntzia urgente.
Problemas igiènicos fintzas in s’iscola mèdia de carrera Marconi, in ue est istada signalada una cantidade manna de brutesa de pugiones in s’intrada e de fragu malu.
Una situatzione assimigiante in s’iscola mèdia Grazia Deledda, in s’istitutu Frassinetti, in ue sos genitores ant naradu chi b’at brutesa de pugiones in su pratzale e chi ant bidu unu sòrighe mannu in su cortile. Mancari epant pulidu dae pagu tempus, sa brutesa b’est torra. In custu casu puru su tzentru-sinistra at pedidu crarimentos a su comune, domandende de intervènnere in presse.
Crititzidades puru in sa primària Sacro Cuore chi, intre erba sica e ammuntonada, est ancora unu cantieri abertu. A custu s’agiunghet sa netzessidade de nde leare sos materiales de sa cobertura chi cuntenent amiantu. Un’ordinàntzia de su sìndigu aiat prevididu de serrare s’iscola, ma pro sa dificultade de sos interventos tocat de rinviare sos traballos.
Maria Giovanna Serchisu
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.