Atòngiu, istajone de cardulinu: is genias chi s’agatant in provìntzia de Aristanis e is consìgios de sa ASL 5
2 Novembre 2026
Novas Aristanesas, lunis 2 de onniasantu de su 2026

Novas Aristanesas, lunis 2 de onniasantu de su 2026
Atòngiu, istajone de cardulinu: is genias chi s’agatant in provìntzia de Aristanis e is consìgios de sa ASL 5 – Cun s’arribu de s’atòngiu torrant is chircadores de cardulinu in is padentes e in is prados de sa provìntzia de Aristanis, in chirca de calidades apretziadas de portare a mesa. Ma intra de is calidades regortas si ddoe podent cuare fintzas genias tosconosas, chi a bortas no est simpre a ddas seberare dae cuddas bonas a papare.
Pro evitare arriscos, sa ASL 5 de Aristanis regordat chi est abertu s’Ispetoradu micològicu, unu servìtziu gratis chi permitit de averiguare sa seguresa de su cardulinu regortu in antis de ddu papare, oferende consulèntzias a is tzitadinos, tzertificatziones pro sa bèndida e sa ristoratzione e fainas de formatzione.
Non cumbenit, difatis, a si fidare de is aplicatziones de reconnoschimentu fotogràficu, chi non semper agiudant a seberare bene una genia de cardulinu dae un’àtera. Pro prenotare una consulèntzia faghet a telefonare, dae su lunis a sa giòbia, a is nùmeros 0783/317787, 0785/560358 e 349/7802834, o si nono a iscrìere a [email protected] o [email protected]. Su cardulinu bolet cunsignadu intreu, friscu, pulidu e partzidu in is genias diferentes, a intro de iscarteddos chìdrinos e istampados. Tocat a portare totu su cardulinu regortu, no una parte isceti.
Sa Asl, in fines, racumandat de non papare cardulinu sena de àere averiguadu in antis si est bonu a papare o nono, de evitare su cardulinu cruu e de ddu papare semper cotu bene. Si acontesset de istare male a pustis de nd’àere papadu, tocat de andare luegos a su Prontu sucursu.
Sa regorta est ligada a genias e a ambientes diferentes. Intra de is genias prus connotas in provìntzia de Aristanis ddoe est s’Antunna Era o Cardulinu de Petza (Pleurotus eryngii), chi creschet in is prados acanta de su gureu e de sa fèrula e si podet papare arrustidu o a cassola, arrubiadu apenas cun ògiu, àgiu e pedrusèmene. In is cussòrgias arenosas e acanta de mare si ddoe agatat sa tùvara, genia de cardulinu chi naschet a suta de terra.
In is càrchiris de mudregu si ddoe agatat su cardulinu de mudregu, mentras intra de is àteras calidades ddoe est su cardulinu grogu o cardulinu de padente, comente a su Boletus edulis, e su cardulinu de tùvara (Agaricus campestris), ispartu in is prados abertos.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.