Una coa de chida de eventos in provìntzia de Aristanis
9 Ottobre 2026
Novas Aristanesas, chenàbura 9 de santugaine de su 2026

Novas Aristanesas, chenàbura 9 de santugaine de su 2026
Una coa de chida de eventos in provìntzia de Aristanis – In provìntzia de Aristanis una coa de chida de passare foras dae domo, peri sos caminos, sas biddas e sos tzentros istòricos, e oportunidades pro connòschere mègius traditziones e logos de su territòriu.
Si comintzat in Monte Arci, ca cras in Abas b’est sa prima de sas chimbe escursiones de sa segunda fase de “Sentieri d’Arci”, chi sunt dedicadas a su patrimòniu naturalìsticu e a sa promotzione de sa calidade enogastronòmica.
In Boàtiri at a èssere sa Garnatza a fàghere de ghia in su Baratili Wine Fest, in mesu de assàgios, itineràrios, murales, atividades pro sas famìllias e ispetàculos. Domìniga sa bidda òspitat finas “Walk for the cure”, sa passigiada solidale pro prevènnere e cuntrastare su tumore a sa tita.
Semper in coa de chida, cun sas Dies FAI de Atùngiu, si podet bisitare sa base de vigilàntzia contra de sos fogos de Fenosu, e sas Dies de su Romànicu permitint de connòschere sas tantas crèsias de su territòriu, dae su santuàriu de Santa Maria de Bonacatu e crèsia de Santa Maria in Bonàrcadu a sa crèsia de Santu Prameri de Bilartzi e de Santu Lenardu de Masuddas.
In Paulle, cras, su parcu archeològicu de Santa Cristina òspitat “Ozu in Brocca” dedicadu a sa calidade in su setore oleàriu e a su potentziamentu de s’oleicoltura. A intro de sa bidda, in sa coa de chida, b’est finas sa prima editzione de “Trame d’Autunno – Voci, luoghi e culture in dialogo”.
In Aristanis campu lìberu a cultura e ispetàculu: cras sero sa Pinacoteca Carlo Còntini òspitat s’eventu finale de sa mustra “Secrets” dedicada a s’universu de Nobuyoshi Araki pro Dromos Festival, e in pratza de sa Sea dòminat s’umorismu de Uccio De Santis, Giovanni Cacioppo e Gianluca Impastato pro sa Sagra de su Mustatzolu e de sa Garnatza chi at a dare briu a sa coa de chida. In ùrtimu, domìniga, torrat “PedaliAmo per la Vita”, sa passigiada in bitzicleta pro ammentare a Gianni Fois e a su sero b’est su cuntzertu de su Trio Lanzini in su Museu Diotzesanu Arborense.
Gianfranca Piras
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.