In zona de Aristanis eventos meda in sa prima coa de chida de santugaine

Novas Aristanesas, chenàbura 2 de santugaine de su 2026

In zona de Aristanis eventos meda in sa prima coa de chida de santugaine – Una coa de chida de cultura, traditziones, mùsica, natura e turismu lentu. Finas a domìniga apuntamentos meda in provìntzia de Aristanis.

In Sèdilo sighit s’apuntamentu dòpiu cun “Ichnos – Sonos de Solidariedade” e “Zenias de Atonzu”, sas duas manifestatziones chi ponent in evidèntzia sa bidda de Guilcier cun traditziones, enogastronomia, artesania, mùsica, ispiritualidade e cultura de sos caddos. A pustis de sas dies passadas, su programma sighit finas pro custa coa de chida, e poi at a torrare su 9 e s’11.

In Tzeddiani cras e domìniga est protagonista s’identidade locale cun “Colori e Radici”. Carreras, pratzas e logos istòricos de sa bidda ant a èssere animados dae mustras, laboratòrios, itineràrios enogastronòmicos, caminadas peri sos sartos, mùsica e propostas dedicadas a sa memòria e a sas traditziones.

In sa tzitade printzipale, domìniga sero b’at mùsica in su Museu Diotzesanu Arborense cun su de tres apuntamentos de “Domenica in concerto”. S’at a esibire su Trio Sheliak, cun Emanuele Brilli chi sonat su violinu, Matilde Michelozzi su violontzellu e Sergio Costa su pianoforte, binchidores de su primu Prèmiu Giangrandi-Eggmann 2025.

Coa de chida prena finas in Nurachi, in ue dae oe finas a domìniga b’est “Nuracque”: turismu responsàbile, atividades, sabores e connoschèntzia de su territòriu.

Semper cras, in Monte Arci b’at una de sas caminadas de su progetu “Custodire il paesaggio, proteggere il futuro” promòvidu dae su Comune de Mragaxori. S’itineràriu at a fàghere a connòschere sa Trébina Longa e sa Trébina Lada, sas duas puntas prus artas de su grupu vulcànicu.
In Marmidda sighit “PasseG..Giare” de su Consòrtziu Turìsticu Due Giare: cras sa destinatzione de sa caminada dedicada a su turismu lentu at a èssere Useddus.

In ùrtimu, in Terraba, domìniga sero in pratza de sa Sea finint sas festas pro Santa Vitàlia cun su cuntzertu de eroCaddeo, unu de sos protagonistas de s’editzione 2025 de X Factor.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.