In provìntzia de Aristanis sa bògia de afestare andat a bratzete cun su respetu de s’ambiente

Novas Aristanesas, giòbia 1 de mese de ledàmene de su 2026

In provìntzia de Aristanis sa bògia de afestare andat a bratzete cun su respetu de s’ambiente – Non sunt “imprea e fùlia” e, duncas, non si-nche iscàvulant a s’àliga a pustis de pagas dies: is bandereddas ddas sunt torrende a fàghere de roba, cosidas a manu e allogadas dae una festa a s’àtera. Dae Assou a Useddus, passende peri Aressa, Mragaxori e Bonàrcadu, sunt semper de prus sas comunidades chi sèberant roba betza colorada pro cuncordare cuddos sinnales de festa chi abbiatzant is bias de is biddas in ocasione de is festas. E, duncas, nudda plàstica.

S’ùrtimu esempru lompet dae Assou, in ue pro sa festa de Santa Lughia, dae su 18 a su 22 de cabudanni, ddoe ant apicadu chentinas de bandereddas fatas a manu dae is fèminas de sa bidda a pees de Jara. Fatas de roba in colore biancu e ruju, chi regordant s’innidesa de sa Santa e su sàmbene de su martìriu suo, ant coloradu is bias de sa bidda. “Totu su chi si podet fàghere pro parare fronte a s’impreu sena de contu de sa plàstica bolet fatu”, at naradu sa presidente de su Comitadu de Santa Lughia, Silvia Frongia. “Assolo”, narat Luciano Montanari, referente territoriale de “Lìberos dae sa Plàstica”, “est su de bator comunes de Marmidda Arta, a pustis de Mragaxori, Useddus e Aressa, chi at fatu custu sèberu”.

Montanari etotu, chi est fintzas professore de Arte e Immàgine in s’Istitutu cumprensivu de Abas, cun su progetu “Is bandereddas mias” at interessadu s’iscola de Useddus. Sunt prus de chentu is bandereddas chi, cun crèsias, nuraghes, matedu e àteras cosas pintadas, ddas ant impreadas pro is festas religiosas e tziviles, favoressende aici s’educatzione ambientale.

In Aressa, pro sa festa de Santu Iroxi, in abrile, dae lentzolos betzos, mallieddas, camisas e àtera genia de roba betza nd’ant bogadu prus de milla bandereddas. In is oras de isprèviu ddas ant fatas duas baressesas, Palmira e Gina, torrende a abbiatzare una costumàntzia chi arriscaiat de si pèrdere.

In fines, dae bator annos in Bonàrcadu impreant bandereddas de roba, talladas e cosidas a manu dae sa cambarada de is “Bandereddas”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.