Tìtulos, medàllias e apuntamentos mannos: s’isport aristanesu protagonista in cabudanni

Novas Aristanesas, martis 15 de cabudanni de su 2026

Tìtulos, medàllias e apuntamentos mannos: s’isport aristanesu protagonista in cabudanni – Dae sos palcoscènicos internatzionales mannos a sos campos de domo, s’isport aristanesu est protagonista. Intre s’acabu de austu e cabudanni resurtados meda, tìtulos ma fintzas apuntamentos chi ant interessadu atletas e sotziedades de sa provìntzia.

A partire dae Sergio Massidda, pesista de Bilartzi, protagonista in sos Giogos de su Mediterràneu in Pùglia in sa categoria finas a 65 chilos. Pro issu unu brunzu in s’istrapu, cun 130 chilos, e s’oro in s’islànciu, in ue nch’at artziadu 162 chilos firmende fintzas su record nou de sos Giogos. “A garegiare in Itàlia est istada una cosa bella meda e m’at dadu un’ispinta de non creere”, at naradu s’atleta, chi est giai pensende a sos Mundiales.

Medàllia de prata pro sa natzionale feminile de pallavolo italiana de Alessia Orro in sos Europeos feminiles de volley. Sa natzionale est istada iscunfita dae sa Turchia pro 3-2 in sa finale de Ìstanbul: 25-16, 22-25, 25-12, 21-25, 10-15. Un’àteru resurtadu manu pro sa pallegiadora de Narabuia, puntu de riferimentu de s’iscuadra asula.

Dae su palcu internatzionale a sas garas regionales. In su tiru cun s’arcu, in Uras, Ilaria Crobu (14 annos) de sa SSD Gate H23 de Aristanis at conchistadu su tìtulu regionale targa in su compound. At bìnchidu puru Serena Manca, prata de classe. Oro pro Alessandro Loi intre sos pitzocos, prata pro Giulia Mulas e brunzu pro Mariella Putzulu intre sas master de s’arcu ricurvu.

E a pustis ancora in Turre Manna s’est serrada dae pagu tempus sa de 12 editziones de su Crai Open – Torneo Città di Oristano, organizadu dae su Tennis Club 70. Giai chentu sos iscritos. Sos tìtulos printzipales sunt andados a Niccolò Dessì e a Eleonora Atzei. In su dòpiu feminile ant bìnchidu Sara Mura e Carolina Giua.

In fines, intre sos ùrtimos eventos isportivos, b’est istadu cussu de sàbadu passadu in su palasport de Sa Rodia chi at ospitadu sa Dinamo Sassari-Brindisi pro su trofeu Città di Oristano, organizadu dae sa Saab Terralba.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.