Sos eventos in sa coa de chida in provìntzia de Aristanis

Novas Aristanesas, chenàbura 11 de cabudanni de su 2026

Sos eventos in sa coa de chida in provìntzia de Aristanis – Una coa de chida prena de apuntamentos in zona de Aristanis, intre isport, traditziones, mùsica, ispetàculu e atividades pro totu sa famìllia.

In Aristanis b’at atentu mannu pro Sardegna Cavalli, chi torrat a pustis de 16 annos in sos impiantos de sa Sotziedade Aristanesa de Ecuitatzione, in Sa Rodia. Finas a domìniga sa manifestatzione proponet bator dies dedicadas a su mundu de sos caddos, cun garas e ispetàculos ma finas folklore, mùsica, una mustra-mercadu, màndigos e atividades pro sas famìllias.

Semper in su capoluogu sighit su Cabudanni Aristanesu. Dae custu sero a domìniga in s’àrea Smart de Toràngius campu lìberu a L’Isola che Vespa, aprontada dae su Vespa Club Sardigna. Cras su Palasport de Sa Rodia òspitat imbetzes s’isfida de pallacanestro intre Dìnamo Tàtari e Valtur Brindisi, e in sos parchègios de Sa Rodia b’at a èssere un’omàgiu a Bud Spencer. Domìniga apuntamentu in pratza Luigi Pintus cun sa de 17 Copas Santa Barbara – Memorial Beppe Meloni, dedicada a su tziclismu.

Sos eventos sighint finas in sas biddas de sa provìntzia. In Baressa dae oe finas a domìniga sas domos padronales retzint sa gente pro sa de 33 editziones de sa Sagra de sa Mèndula.

In Sabarussa su Cabudanni Sabarussesu proponet pro domìniga in sa palestra comunale su seminàriu Danza in sospensione cun sa mastra Elena Allevi. In Bilartzi, in localidade Trempu, sighint sas festas tziviles e religiosas in onore de Santa Maria de s’Ausìliu, cun momentos de fide, de traditzione e de allegria.

In Crabas pro s’Istiu Crabarissu cras sa pratza Stagno òspitat “Un mondo di sport”, una die de festa e de presentatzione cun sa partetzipatzione de sos assòtzios isportivos de su territòriu.

In ùrtimu, custu sero in Bosa su penùltimu apuntamentu de sa rassigna “Tramonti al Castello” de sa Fundatzione Bosa al Castello di Serravalle, cun un’atopu chi faeddat de s’istòria de s’isport in Sardigna.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.