Sa Cursa de sos Iscurtzos: s’istòria a palas de sa traditzione

Novas Aristanesas, chenàbura 4 de cabudanni de su 2026

Sa Cursa de sos Iscurtzos: s’istòria a palas de sa traditzione – Crabas s’est preparende a vìvere cras sas festas in onore de Santu Srabadori cun sa Cursa de sos Iscurtzos, s’apuntamentu chi ogni prima domìniga de cabudanni aunit chentinas de òmines e de pitzocos in una de sas funtziones religiosas prus ammajadoras de Sardigna. Est finas s’oportunidade de torrare a ammentare s’istòria e sos contos antigos chi sunt fundamentu de custa traditzione populare identitària.

Sa protzessione de Santu Srabadori de Sinis, connota comente “Cursa de sos Iscurtzos”, si faghet a pees iscurtzos pro sos sete chilòmetros chi dividint sa bidda de Crabas dae sa bidditzola de Santu Srabadori de Sinis, in ue b’est sa crèsia de campagna dedicada a su Sarbadore, fraigada prus o mancu in su sèculu XVII.

S’orìgine de custa traditzione est datada 1619, cando sas bardanas de sos Moros aiant minetzadu su territòriu. Pro difèndere sa màgine de su Sarbadore in unu de custos atacos, sos abitantes aiant fatu una cursa longa e lestra. Su contu narat chi sos òmines s’aiant ligadu rampos a sos pees nudos pro nde pesare cantu prus prùene possìbile, a manera de pàrrere un’esèrtzitu numerosu. S’imbentu at funtzionadu bene meda: sos Moros, timende, si nche sunt fuidos. Sa bidda e sa màgine si sunt sarvados. Dae cussu momentu ogni annu su ritu si faghet ogni annu pro ammentare cussu episòdiu miraculosu e pro onorare su votu fatu a su Santu.

Sa traditzione cheret chi sa màgine abarret in Crabas finas a su sàbadu mangianu in antis de sa prima domìniga de cabudanni. Chentinas de giòvanos, bestidos in àbidu biancu ligadu in chintu dae unu cordone, iscurtzos e currende andant peri caminos prenos de prùene e de pedra giughende a pala sa màgine finas a sa biddighedda de Santu Srabadori de Sinis. Sa màgine b’abarrat finas a su merie de sa domìniga, cando is curridoris nche la torrant currende a Crabas, a sa crèsia de Santa Maria Assunta in ue la custoint finas a s’annu imbeniente.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.