Pontes e fèrias: sas datas de sinnare in su calendàriu

Novas Aristanesas, martis 29 de cabudanni de su 2026

Pontes e fèrias: sas datas de sinnare in su calendàriu – Cunsiderende sos pontes, est giai tempus de pensare a sas vacàntzias chi ant a arribare. Intre s’acabu de su 2026 e su 2027 su calendàriu no at a èssere generosu meda, ma carchi festa s’at a pòdere mudare, cun pagas dies de fèrias, in pasos prus longos. In Sardigna, in ue partire cheret nàrrere bortas meda a prenotare cun tempus bolos e cullegamentos, cumbenit a si marcare luego sas datas de isfrutare.

Sa prima est in nadale. S’Immaculada at a èssere in martis e at a bastare una die de fèrias, lunis 7 de nadale, pro si fàghere bator dies de pasu, dae su 5 a s’8. Pasca de Nadale at a èssere imbetzes in chenàbura, mentres su mègius at a èssere a s’acabu de s’annu: leende fèrias dae su 28 a su 31 de nadale s’at a pòdere abarrare in domo dae su 25 de nadale a su 3 de ghennàrgiu, pro deghe dies a fila. Agiunghende fintzas su ponte de s’Immaculada, 5 dies de fèrias ant a pòdere divènnere 14 dies de pasu.

Su 2027 at a partire a sa matessi manera. Sa prima die de s’annu at a èssere in chenàbura e Pasca de sos Tres Res in mèrcuris: cun duas dies de fèrias, su 4 e su 5 de ghennàrgiu, s’ant a pòdere tènnere ses dies a fila de pasu.

A pustis su calendàriu frenat. Pasca de abrile at a èssere in domìniga e su 25 de abrile puru, mentres sa prima die de maju in sàbadu, sena regalare dies in prus a chie traballat dae su lunis a sa chenàbura. Andat mègius su 2 de làmpadas chi est in mèrcuris: duas dies de fèrias ant a permìtere de fàghere unu ponte de chimbe dies.

In atòngiu b’at a àere duas coas de chida longas: su 4 de santugaine, festa natzionale noa de Santu Frantziscu de Assisi, at a èssere in lunis, e gasi puru Ognassantu sa prima die de santandria. In fines, s’Immaculada, in mèrcuris, at a permìtere de arribare a noe dies a fila, leende bator dies de fèrias. Pasca de Nadale e Santu Istèvene ant a èssere in sàbadu e domìniga.

Pro sos sardos, però, su contu non si firmat a sas dies lìberas: in sos tempos chi b’at prus rechestas de bolos, traghetos e allògios si prenant in presse. Duncas tocat de si mòvere cun tempus.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.