Novas Aristanesas, chenàbura 25 de cabudanni de su 2026

Novas Aristanesas, chenàbura 25 de cabudanni de su 2026

Una coa de chida de eventos in provìntzia de Aristanis – Una coa de chida prena de eventos in provìntzia de Aristanis. Cultura e isport in sa tzitade printzipale: oe e cras in su Palasport Sa Rodia si giogat su de 4 torneos internatzionales Sardigna Volleyball Challenge de pallavolo feminile, e sighit finas a domìniga sa Sardinia Gravel Race, eventu tziclìsticu internatzionale a in ue bi partètzipat finas Turre Manna, cun firmada finas in su Sinis e in su Terrabesu.

Custu sero in su Teatru Garau b’est s’eventu finale de Island Connect II, cun ispetàculu de dantza contemporànea e acrobàtica aèrea e poi una mesa tunda pro faeddare de su ligàmene intre istitutziones, cultura, tzitadinàntzia e impresa. E ancora, pro su Cabudanni Aristanesu, cras in s’Hospitalis Sancti Antoni una die dedicada a sas àreas birdes e a sos eventos climàticos. In s’impiantu isportivu de Toràngius cras comintzat su 1° torneu de pallavolo de ispiàgia e tennis. Domìniga in pratza Abis si faghet sa Festa de su Burgu, e in Silì comintzant sas festas pro Santu Micheli Arcàngiulu. Semper in tzitade, oe e cras, su de chimbe Forum natzionales de s’Iscola de su Pòpulu e domìniga sero in su Museu Diotzesanu Arborense, pro sa rassigna “Domìniga in cuntzertu”, su cuntzertu “Classiche emozioni”.

E poi sas traditziones. In Bonàrcado ancora festa pro Nostra Segnora de Bonacatu. Cras sa die dedicada a sas fèminas chi si narant comente sa patrona, cun missa a sas 5 e mesa (h 17.30). A sero, poi, su cunvegnu “Il mio nome è Bonacatu – Un nome, una storia” cun Raffaele Cau. Domìniga finit totu cun sa missa e sa protzessione peri sa bidda.

In Sabarussa, cras pro su Cabudanni Sabarussesu b’est s’Alliga Day e a sero in crèsia majore “Cantos de Cabudanni” cun sos coros polifònicos. In Norghiddo, imbetzes, finit cras sa festa de Santa Maria de sa Mertzede.

In ùrtimu, pro sos prus piticos, oe in sa pineta de Zuràdili in Marrùbiu b’est s’eventu “Tutto suona: dallo scarto al suono”.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.