Merenda in iscola, sos cussìgios de sa Asl 5 de Aristanis pro un’apicòniu sanu

Novas Aristanesas, martis 22 de cabudanni de su 2026

Merenda in iscola, sos cussìgios de sa Asl 5 de Aristanis pro un’apicòniu sanu – Cun sa torrada a iscola, a pustis de su pasu de s’istiu, torrat fintzas s’usàntzia de sa merenda a metade de mangianu. Un’apuntamentu piticu de ogni die chi, in prus de si leare un’apicòniu intre una letzione e s’àtera, podet èssere un’ocasione pro educare sos prus giòvanos a un’alimentatzione echilibrada e a sèberos prus giustos. Pro ghiare sas famìllias in su sèberu de sa merenda de pònnere in su zàinu, sa Asl 5 de Aristanis at difùndidu unos cantos cussìgios de sa biòloga Simonetta Milia, de su Servìtziu Igiene de sos Alimentos e de sa Nutritzione.

Su puntu de partèntzia est sìmplitze: sa merenda devet diventare unu segundu pastu, dat s’energia giusta pro imbàtere a su pràngiu ma sena apesantire. Pro custu est importante a variare sos alimentos e a privilegiare cussos sìmplitzes, evitende apicònios cunfetzionados, merendinas, produtos cun tzùcaru meda o bevandas durches.

Intre sas alternativas prus adatas b’est sa fruta frisca, fintzas giai aprontada pro la pòdere consumare sena dificultade in iscola, e àteros alimentos sìmplitzes. Fintzas su yogurt, su pane e produtos fatos in su furru pagu elaborados si podent impreare, mentres su sèberu diat dèpere tènnere contu de s’edade de su pitzinnu, de sas esigèntzias suas e si tenet carchi allergia o intolleràntzia.

Tocat de dare atentu a sas portziones: fintzas un’alimentu sanu, si si nde màndigat tropu, arriscat de mudare su pasu in unu càrrigu de calorias. Mègius un’apicòniu, e abba, chi est sa mègius cosa. Contat fintzas sa presentada: cambiare colores, cunsistèntzias e propostas podet agiudare sos prus piticos a s’acostare cun curiosidade a alimentos diversos.

Su cussìgiu de sa Asl 5 est duncas cussu de non chircare sa merenda “perfeta”, ma de fàghere un’abitùdine basada subra s’echilìbriu, sa semplitzidade e sa variedade. Su pasu intre una letzione e s’àtera gasi podet diventare non solu unu momentu pro mandigare carchi cosa, ma fintzas un’ocasione educativa.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.