Mancant pagas dies a su sonu de sa campanedda: si torrat a iscola, bisende sas vacàntzias

Novas Aristanesas, martis 1° de cabudanni de su 2026

Mancant pagas dies a su sonu de sa campanedda: si torrat a iscola, bisende sas vacàntzias – Mancant duas chidas a su sonu de sa prima campanedda: fintzas in provìntzia de Aristanis su 16 de cabudanni sos istudiantes ant a torrare a iscola, dae sas iscolas de s’infàntzia a sas superiores.

L’at istabilidu sa Giunta regionale aprovende su calendàriu iscolàsticu 2026-2027, cun proposta de s’assessora de s’Istrutzione Pùbblica Ilaria Portas. S’ùrtima die de letzione est fissada a s’8 de làmpadas de su 2027, mentres sas iscolas de s’infàntzia ant a serrare su 30 de làmpadas.

Sas dies de letzione ant a èssere in totu 204 — o 203 si sa festa de su Santu Patronu de su comune de apartenèntzia est in una die de iscola. Ma intre zàinos de prenare e libros de comporare, b’est giai chie abbàidat su calendàriu cun ispìritu diversu: cussu de chie cheret ischire non cando si comintzat, ma cando si torrat a domo.

Sas vacàntzias de Nadale ant a comintzare su 23 de nadale de su 2026 e ant a durare finas a su 5 de ghennàrgiu de su 2027, e si torrat a iscola su 7. Martis de Carrasegare, su 9 de freàrgiu, at a èssere vacàntzia. Sas vacàntzias de Pasca ant a èssere dae su 25 a su 30 de martzu de su 2027, cumpresu su Lunis de s’Ànghelu de su 29. Su 28 de abrile s’at a festare Sa Die de sa Sardigna.

Intre sas festas natzionales bi sunt: su 4 de santugaine, su Patronu de Itàlia, Santu Frantziscu de Assisi; sa prima die de santandria chi, a dolu mannu, ocannu est in domìniga; s’8 de nadale, s’Immaculada; su 25 e su 26 de nadale, sa die de Nadale e sa die de Santu Istèvene; sa die de Annu Nou e sa Pasca de sos Tres Res su 6 de ghennàrgiu. Su 25 de abrile, s’Anniversàriu de sa Liberatzione, sa prima die de maju, sa Festa de su Traballu, e su 2 de làmpadas, sa Festa de sa Repùbblica, ant a èssere a pagas dies dae s’ùrtima campanedda, cando sas vacàntzias de istiu sunt arribende.

Ogni istitutu disponet in fines de duas dies in prus de impreare tràmite delìbera de su Cussìgiu de Istitutu, e a custas s’agiunghet sa die de su Santu Patronu si est in tempus de iscola. In totu, giai una deghina de pasadas pro firmare sa cursa longa de s’annu iscolàsticu.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.