Iscusòrgios birdes de sa provìntzia de Aristanis: curas pro s’ogiastru de Donigala

Novas Aristanesas, mèrcuris 23 de cabudanni de su 2026

Iscusòrgios birdes de sa provìntzia de Aristanis: curas pro s’ogiastru de Donigala – Non presentant nen pedra nen màrmaru, ma raighinas fungudas chi nos contant sèculos de istòria. In provìntzia de Aristanis sunt a su mancus 57 is matas monumentales contadas dae su Registru de is Matas Monumentales Italianas. Una sienda birde isparta in ònnia logu, dae Arborea a Cùglieri, dae Santu Lussurzu a Aristanis, cun sa cuntzentratzione prus manna in Làconi (20 matas).

In su cabulogu de provìntzia is matas monumentales sunt bator: intra de custas ddoe est s’ogiastru de Santa Petronilla, in Donigala Fenughedu, chi immoe est torra interessadu dae un’interventu de amparu e allogu.

Su Comune de Aristanis at otentu dae sa Regione Sardigna unu contributu de 7.320 èuros pro su contivìgiu de custa mata. Su finantziamentu faghet parte de su bandu regionale pro s’amparu de is matas monumentales iscritas in s’Elencu de is Matas Monumentales de Itàlia.

Intra de is matas prus antigas de su logu de Aristanis, s’ogiastru s’agatat in sa pratza de sa crèsia de sartu de Santa Petronilla, a pagu tretu dae su parcu comunale de Donigala Fenughedu.

Is averiguaduras tècnicas nd’ant fatu essire a pìgiu sa presèntzia de cambos sicados, mudaduras istruturales de sa linna e su bisòngiu de donare atentu mannu a is cambos de su costadu, unos cantos giai agiudados dae punteddos. Sa mata, però, est biatza e podet campare ancoras tempus meda cun contivìgios de allogu. Dae sa pudadura de is cambos sicados, a su de pudare e pònnere in seguresa sa coma a su contivìgiu de is raighinas. Su progetu previdet fatu-fatu fintzas unu monitoràgiu.

Is traballos ddos ant a fàghere intra de is meses de santugaine e onniasantu.

“S’ogiastru de Santa Petronilla est unu monumentu ischietu de sa comunidade nostra e allogat sèculos de istòria de su territòriu de Donigala Fenughedu”, narat s’assessora de s’Ambiente Maria Bonaria Zedda. “Su de investire in s’amparu de is matas monumentales bolet nàrrere a avalorare su patrimòniu ambientale nostru, cussu culturale e cussu paesagìsticu, pro ddu lassare in cunditziones bonas a is generatziones de su benidore”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.