Influèntzia, totu prontu pro sa campànnia noa de vatzinatzione: in provìntzia de Aristanis s’at a pòdere fàghere in unos cantos logos

Novas Aristanesas, giòbia 24 de cabudanni de su 2026

Influèntzia, totu prontu pro sa campànnia noa de vatzinatzione: in provìntzia de Aristanis s’at a pòdere fàghere in unos cantos logos – Cun s’arribu de s’atòngiu s’atentu pro sa preventzione de s’influèntzia de istajone torrat a si fàghere artu. Sa vatzinatzione, difatis, abarrat una de is ainas prus atzivas pro ismenguare s’arriscu de cumplicatziones, prus che totu intra de antzianos, persones dìligas e àteros sugetos dèbiles. Sa simana mègius pro fàghere su vatzinu est intra de is meses de santugaine e onniasantu, a manera de arribare amparados cando s’isparghidura de su virus at a èssere prus manna, intra de su mese de nadale e freàrgiu.

In provìntzia de Aristanis sa campànnia 2026/2027 at a mòvere in una retza prus manna de logos e de servìtzios. Sa Asl 5 at prevìdidu s’interessamentu de is Domos de sa Comunidade e de is tres ispidales de sa provìntzia, su “Santu Martinu” de Aristanis, su “Delogu” de Ilartzi e su “Mastino” de Bosa.

Sa campànnia at a mòvere su 1 de santugaine in is domos de reposu e in is residèntzias assistentziales, a ue ddoe ant a andare is operadores de su Servìtziu de Igiene e Sanidade pùblica pro fàghere su vatzinu a is òspites. Pro is àteros tzitadinos, imbetzes, su cumentzu est istabilèssidu pro su 9 de onniasantu. In sa pròpria setziada, in seguresa, s’at a pòdere fàghere fintzas su vatzinu contras de su pneumococo e contras de sa Covid-19.

Ma nch’at unas cantas novas chi pertocant is Domos de sa Comunidade. Ant a cuncordare dies de vatzinatzione in is istruturas giai ativas de Bosa, Ilartzi, Làconi, Aristanis, Samugheo, Santu Lussurzu e Tramatza. No ant a istentare a bogare su calendàriu, cun is datas e cun is maneras pro si pòdere bàlere de su servìtziu.

In fines, gràtzias a su progetu “Ispidale chi vatzinat”, in is tres presìdios s’at a pòdere fàghere su vatzinu a su personale sanitàriu, ma fintzas a is malàidos ricoverados, a cussos in dimissione o chi andant a is ambulatòrios o chi sunt in day ospital, a prus de is atendentes issoro.

Sa Asl 5 punnat a ispàrghere bene su servìtziu de vatzinatzione in totu sa provìntzia, cun un’atentu prus mannu a is persones prus dìligas. Pro su 7 de onniasantu, in fines, est in programma un’addòbiu cun is mèigos de Meighina generale, is pediatras e is àteros professionistas de sa sanidade pro faeddare prus a fine de sa campànnia de vatzinatzione.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.