In cabudanni comintzant sas mammografias fintzas su sàbadu

Novas Aristanesas, martis 8 de cabudanni de su 2026

In cabudanni comintzant sas mammografias fintzas su sàbadu – Dae custu mese sa Asl de Aristanis ismànniat sos oràrios pro sas mammografias: in prus de sos apuntamentos dae su lunis a sa chenàbura, s’at a pòdere fàghere sa mammografia fintzas su sàbadu mangianu, pro favorèssere sas fèminas chi traballant.

L’at naradu sa diretora de su dipartimentu de Preventzione Maria Valentina Marras, ammentende chi su percursu de su screening dat istandard de calidade prus chi non sa mammografia comune: «Su matessi esame lu leghent duos radiòlogos e su resurtadu est incrociadu pro sos refertos, e gasi si reduet s’arriscu de faddinas de letura e de farsos positivos o negativos».

Su screening oncològicu est un’istrumentu gratùitu e utilosu meda chi podet redùere finas a su 50% sa mortalidade de sos tumores a sa mammidda, a su colon e a s’ùteru. Tres esames sìmplitzes e lestros: sa mammografia pro su sinu, sa chirca de su sàmbene cuadu in sas feces pro su colon, e su pap test pro s’ùteru. Sa Asl los proponet sena fàghere pagare nudda a sa gente in sas edades prus in arriscu, est a nàrrere: sas fèminas intre sos 50 e sos 69 annos pro sa mammidda, òmines e fèminas intre sos 50 e sos 69 annos pro su colon, sas fèminas intre sos 25 e sos 64 annos pro s’ùteru.

Pro aderire bastat de rispòndere a sa lìtera de invitu arribada a domo. In Itàlia su tumore de sa mammidda contat 55.000 casos noos a s’annu, cussu de su colon 52.000, cussu de s’ùteru est su de bator pro intzidèntzia in sas fèminas, cun giai 8.700 casos ogni annu. «Naramus a totu sas persones chi retzint sa lìtera a bìnchere sa timòria e a aderire sena dùbbiu: est unu sèberu chi podet a beru sarvare sa vida», narat sa diretora generale de sa Asl Grazia Cattina. Pro informos: nùmeru birde 800 186 000 o [email protected].

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.